Uzrovień dalejšych adnosin Biełarusi ź Jeŭraparłamientam budzie zaležać ad vynikaŭ parłamienckich vybaraŭ, zajaviŭ eks-palitviazień Mikałaj Statkievič pa vynikach svajho vizitu ŭ Brusiel 17—19 lutaha.
Parłamienckija vybary, nahadajem, pavinny adbycca nie paźniej za 11 vieraśnia 2016 hoda.
U Brusieli Statkievič vystupiŭ z dakładam pa situacyi ŭ Biełarusi na pasiadžeńni frakcyi Jeŭraparłamienta «Prahresiŭny aljans sacyjalistaŭ i demakrataŭ», a zatym i na pasiadžeńni hrupy Jeŭraparłamienta pa suviaziach ź Biełaruśsiu, dzie, pavodle jaho słoŭ, vykazaŭ svaju niehatyŭnuju pazicyju adnosna rašeńnia ES źniać bolšaść sankcyj ź biełaruskich čynoŭnikaŭ i pradpryjemstvaŭ.
Pavodle słoŭ palityka, deputaty Jeŭraparłamienta chočuć vykarystać situacyju z admienaj sankcyj u dačynieńni da biełaruskich čynoŭnikaŭ. «Jany buduć vykarystoŭvać siońniašniuju situacyju, bo jość šmat deputataŭ, jakim byŭ zabaronieny ŭjezd u Biełaruś. Ciapier jany źbirajucca pryjazdžać, naprykład, polskija deputaty majuć namier ščylna zaniacca prablemami Sajuza palakaŭ na Biełarusi», — skazaŭ jon.
Statkievič nie vyklučaje sustreč jeŭradeputataŭ z deputatami Pałaty pradstaŭnikoŭ. «Ale jany buduć prachodzić, kab pasłuchać ich pazicyju. Biełaruski parłamient u Jeŭranest pakul uklučany nie budzie. Kryteryj taki: nieabchodnyja źmieny vybarčaha zakanadaŭstva i reabilitacyja palitviaźniaŭ. Akramia taho, šmat što budzie zaležać ad taho, jak projduć vybary. Pa ich vynikach u parłamiencie pavinna być apazicyja. Tolki tady Pałata pradstaŭnikoŭ moža trapić u Jeŭranest», — adznačyŭ jon.
Taksama Statkievič paviedamiŭ, što dla deputataŭ Jeŭraparłamienta važna, jak buduć padrychtavanyja vybary. «Jany pytalisia, ci mahčyma źmianić umovy praviadzieńnia vybaraŭ, nie źmianiajučy zakon. U pryncypie, napeŭna, možna palepšyć umovy pastanovami Centrvybarkama, ale heta vielmi nienadziejna, pra ich možna budzie zabyć, kali ŭłady ŭbačać, što šmat hałasoŭ addajecca ŭ padtrymku apazicyi», — skazaŭ jon.
Nahadajem, Saviet ministraŭ zamiežnych spraŭ krain ES na pasiadžeńni 15 lutaha ŭ Brusieli nie praciahnuŭ dziejańnie sankcyj u dačynieńni da 170 fizičnych i troch jurydyčnych biełaruskich asob. U toj ža čas pad dziejańniem vizavych i ekanamičnych sankcyj zastajucca čaćviora hramadzian, jakich ES ličyć datyčnymi da źniknieńniaŭ palitykaŭ u 1999—2000 hadach: Uładzimir Navumaŭ (były ministr unutranych spraŭ), Viktar Šejman (były kiraŭnik Administracyi prezidenta), Juryj Sivakoŭ (u pieryjad źniknieńnia palitykaŭ zajmaŭ pasadu kiraŭnika MUS) i Dźmitryj Paŭličenka (kamandzir bryhady śpiecnaza ŭnutranych vojskaŭ MUS). Jeŭrasajuz taksama zachavaŭ embarha na pastaŭki ŭzbrajeńniaŭ.
Staršynia delehacyi Jeŭraparłamienta pa adnosinach ź Biełaruśsiu Bohdan Zdrujeŭski płanuje naviedać Minsk u mai. Płanujucca jaho vizity ŭ stalicu i Hrodna.
