10 lutaha sud Pieršamajskaha rajona Minska pryhavaryŭ chulihana da dvuch hadoŭ abmiežavańnia voli pavodle abvinavačańnia ŭ rabavańni i źbićci hieja z-za jaho seksualnaj aryjentacyi. Heta pieršy ŭ historyi Biełarusi prysud pa złačynstvie na hlebie hamafobii, paviedamlaje Biełaruski pravaabarončy centr «Identyčnaść».
Viadoma, što abvinavačany ŭvachodziŭ u hrupu «Akupaj-piedafilaj». Sa svajoj budučaj achviaraj paznajomiŭsia ŭ sacyjalnaj sietcy «UKantakcie».
5 listapada 2015 hoda novyja znajomyja sustrelisia kala adnoj sa stancyj minskaha mietro, nabyli ŭ supiermarkiecie piva, cyharety i čypsy i nakiravalisia raśpivać śpirtnoje ŭ dvor žyłoha doma. Praz hadzinu abvinavačany pačaŭ cikavicca seksualnaj aryjentacyjaj paciarpiełaha. Pierakanaŭšysia ŭ tym, što małady čałaviek — hiej, abvinavačany niekalki razoŭ jaho ŭdaryŭ, zatym dastaŭ mabilny telefon i pačaŭ vieści videazapis. Abvinavačany prymušaŭ svaju achviaru pryznavacca ŭ jaho homaseksualnaści, raskryvać asabistyja źviestki (proźvišča i imia, miesca žycharstva, miesca pracy), raspytvaŭ pra jaho seksualny vopyt. Napadnik patrabavaŭ, kab paciarpieły spyniŭ homaseksualnyja kantakty, inakš pra jaho aryjentacyju daviedajucca ŭce.
Paśla taho jak videazdymka była skončanaja, złamyśnik zapatrabavaŭ u paciarpiełaha hrošy na cyharety i sam dastaŭ ź jaho kašalka 100 tysiač rubloŭ.
Złačyniec asudžany na padstavie č. 1 art. 339 (chulihanstva) i č. 2 art. 206 (rabavańnie, učynienaje z pahrozaj prymianieńnia hvałtu) Kryminalnaha kodeksa i pryhavorany da dvuch hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Akaličnaściu, što abciažvaje adkaznaść, pryznanaje ŭčynieńnie złačynstva pavodle matyvaŭ varožaści abo roźni ŭ dačynieńni da sacyjalnaj hrupy — ŁHBT-supolnaści.
Abvinavačany taksama abaviazany vypłacić paciarpiełamu kampiensacyju maralnaj škody ŭ 5 młn rubloŭ, materyjalnaj škody — 150 tys. rubloŭ, a ŭ lik sudovych vydatkaŭ i pasłuh advakata — 2,5 młn rubloŭ.
U sudzie abvinavačany pryznaŭ svaju vinu i zajaviŭ, što raskajvajecca ŭ zroblenym.
