U Słonimskim centry kultury ŭ piatnicu, 5 lutaha, adbyłosia ŭračystaje mierapryjemstva, pryśviečanaje adkryćciu hoda kultury ŭ Biełarusi. U mierapryjemstvie ŭziali ŭdzieł najlepšyja mastackija kalektyvy Słonimščyny, jakija šmat razoŭ stanavilisia pieramožcami roznych konkursaŭ i fiestyvalaŭ.
Śviata adkryŭ staršynia Słonimskaha rajvykankama Aleh Tarhonski. U svaim śviatočnym pryvitańni kiraŭnik rajona raspavioŭ ab kulturnych mierapryjemstvach, jakija pavinny sioleta adbycca na słonimskaj ziamli. U pryvatnaści, Aleh Tarhonski nahadaŭ, što sioleta namahańniami ŭsich słonimcaŭ i kiraŭnictva rajona pavinien być adkryty pomnik byłomu słonimskamu staroście, kancleru Vialikaha Kniastva Litoŭskaha Lvu Sapiehu (1557-1633).
Nahadajem, pry Lvu Sapiehu Słonim staŭ kulturnym, pramysłovym i palityčnym miescam. Pobač z zamkam na bierazie Ščary kancler Sapieha ŭźvioŭ muravany pałac, dzie sa studzienia 1597 hoda prachodzili hienieralnyja siejmiki Vialikaha kniastva Litoŭskaha. U słonimskim zamku znachodziłasia i dobraja biblijateka, archiŭ, tvory mastactva. Leŭ Sapieha dobraŭparadkavaŭ u Słonimie vulicy, masty, darohi, pabudavaŭ šmat aŭsteryj. Jon adkryŭ novyja kirmašy, pramysłovyja manufaktury, budavaŭ administratyŭnyja i haspadarčyja budynki.
