Ministerstva justycyi prypyniła dziaržaŭnuju rehistracyju partyi «Biełaruskaja chryścijanskaja demakratyja». Pra heta havorycca ŭ liście ź Ministerstva justycyi, jaki atrymała kiraŭnictva arhkamiteta pa stvareńni partyi.
U adpaviednaści z zakanadaŭstvam Ministerstva justycyi pavinna pryniać rašeńnie ab rehistracyi ci admovie ŭ rehistracyi na praciahu miesiaca. U toj ža čas u ministerstva jość mahčymaść prypynić rehistracyju dla vyvučeńnia dadatkovych dakumientaŭ.
«Vidavočna, što režymu, jaki čakaje admieny vizavych abmiežavańniaŭ dla dziaržaŭnych čynoŭnikaŭ, treba paciahnuć čas, padviesić situacyju z rehistracyjaj BCHD, — havorycca ŭ paviedamleńni pres-słužby arhanizacyi. — Rašeńnie adkładzienaje da lutaha, kali ES płanuje vyrašyć pytańnie ab sankcyjach u dačynieńni da pradstaŭnikoŭ ułady ŭ Biełarusi».
Arhkamitet BCHD ličyć, što ŭ Miniusta niama zakonnych pryčyn, kab adkładać abo prypyniać rehistracyju partyi.
Ustanoŭčy źjezd partyi prajšoŭ 12 śniežnia ŭ Minsku, dakumienty ŭ Miniust na rehistracyju byli pieradadzienyja 24 śniežnia.
Arhkamitetu BCHD raniej było admoŭlena ŭ rehistracyi partyi piać razoŭ. Pieršy ŭstanoŭčy źjezd partyi prajšoŭ u 2009 hodzie, u 2010-m — jašče dva. Čaćviortaja sproba rehistracyi partyi była zroblenaja ŭ śniežni 2011-ha, a piaty ŭstanoŭčy źjezd adbyŭsia 13 červienia 2015 hoda. Siarod pryčyn apošniaj nierehistracyi Miniust nazyvaŭ admovu dvuch zasnavalnikaŭ partyi ad svaich podpisaŭ, a taksama drobnyja niedakładnaści, jakija, na dumku pradstaŭnikoŭ BCHD, nie mohuć stavić pad sumnieŭ rehistracyju palityčnaj partyi.
Adznačym, što chryścijanskija demakraty Biełarusi nie adnojčy sprabavali zarehistravacca taksama ŭ jakaści roznych rehijanalnych i respublikanskich hramadskich abjadnańniaŭ.
Raniej chryścijanskija demakraty zajaŭlali pra namier padać zajaŭku na ŭklučeńnie ŭ Knihu rekordaŭ Hiniesa pa kolkaści admoŭ u rehistracyi.
U sakaviku 2011 hoda ŭ intervju The Washington Post Alaksandr Łukašenka zajaviŭ, što BCHD, «vierahodna, nikoli nie budzie zarehistravanaja». «Jany ŭdzielničali ŭ biesparadkach. Jany nie chryścijanskija demakraty, jany bandyty», — skazaŭ jon.
