Dabračynnaja arhanizacyja Rusfond nakiravała ŭ Śledčy kamitet RF zajavu z prośbaj raspačać kryminalnuju spravu pa fakcie kradziažu amal 21 młn rasijskich rubloŭ, sabranych u 2014 hodzie na lačeńnie śpiavački Žanny Fryskie, piša «Kamiersant».
Fota: Dźmitryj Karatajeŭ / Kamiersant
Jak zajaviła jurydyčnaja słužba Rusfonda, prajšło bolš za paŭhoda z dnia śmierci Fryskie, i fond ciapier vałodaje infarmacyjaj, što hrošy z rachunku śpiavački źnikli. Śćviardžajecca, što hetyja hrošy mahli być pieraličanyja na rachunki trecich asob.
Jak paviedamili jurysty fondu, 4.120.000 rasijskich rubloŭ z sabranych hrošaj było vydatkavana na lačeńnie śpiavački, a spravazdačy pra zvyš jak 20 młn rasijskich rubloŭ niama. Pakolki svajaki śpiavački nie padavali fondu spravazdačy ab vydatku srodkaŭ, arhanizacyja paprasiła Śledčy kamitet raspačać spravu ab kradziažy.
«U adras spadkajemcaŭ Žany, jakija ŭstupili, u adpaviednaści z zakonam, u prava na spadčynu praz paŭhoda paśla jaje śmierci, heta značyć 16 śniežnia, Rusfond nakiroŭvaŭ patrabavańni dać spravazdaču pra 20.890.831 rasijskich rubloŭ, ale nijakaha adkazu nie atrymaŭ. Vyniku nie dało i apaviaščeńnie spadkajemcaŭ pra patrabavańni Rusfonda, vystaŭlenyja im praz nataryusa, jaki afarmlaŭ zapaviet Žany Fryskie. Takim čynam, dasudovaha ŭrehulavańnia sprečki nie adbyłosia», — havorycca ŭ zajavie jurydyčnaj słužby Rusfonda.
U studzieni 2014 stała viadoma, što Fryskie chvoraja na rak. Paśla hetaha rasijski Pieršy kanał arhanizavaŭ zbor srodkaŭ na lačeńnie śpiavački, u jakim udzielničaŭ i Rusfond. Pavodle zakona, dabračynny fond moža zachoŭvać srodki na svaim rachunku nie bolš za hod, tamu 19 kastryčnika 2014 hoda byŭ zaklučany dahavor pamiž Žannaj Fryskie i Rusfondam, pavodle jakoha na asabisty rachunak śpiavački pieraličyli 25 młn rasijskich rubloŭ.
U svaju čarhu baćka Žany Fryskie zajaviŭ, što hatovy da vyrašeńnia hetaha pytańnia ŭ sudovym paradku. «Jakoje prava jany («Rusfond») majuć niešta kazać? Adkul jany viedajuć, jość tam hrošy ci nie, kali idzie sud, usio aryštavana? Dostupu da rachunku niama. Jak jany mohuć kazać, što hrošy vykradzienyja, kali my jašče sami nie viedajem, jość tam hrošy ci nie? Spadčynu nichto nie vyznačyŭ, idzie sud, i budzie iści jašče da maja—červienia. Niaŭžo niechta dumaje, što my lačyli jaje biaspłatna? Kolki kaštavaŭ adzin tolki samalot, kab jaje pieravieźci…», — skazaŭ ahienctvu TASS Uładzimir Fryskie.
Śpiavačka Žana Fryskie pamierła ad raku mozhu ŭ mai 2015 hoda va ŭzroście 41 hoda.
