Akcior Džejmi Foks, jaki syhraŭ hałoŭnuju rolu ŭ viesternie Kviencina Tarancina «Džanho vyzvaleny», vyratavaŭ kiroŭcu, jaki patrapiŭ u avaryju — jon vyciahnuŭ jaho z pałajučaha aŭtamabila, paviedamlaje partał TMZ.
Incydent adbyŭsia viečaram 18 studzienia prama nasuprać doma Foksa ŭ miastečku Chejden-Veli niedaloka ad Łos-Andželesa.
Jak adznačaje vydańnie, mašynu, vierahodna, zaniesła na mokraj darozie, i kiroŭca nie spraviŭsia z kiravańniem. Aŭtamabil vylecieŭ u kiuviet, niekalki razoŭ pierakuliŭsia i zahareŭsia.
Pa słovach Foksa, jon pačuŭ šum, vybieh na vulicu i ŭbačyŭ Toyota Tacoma, achoplenuju połymiem. Bajučysia, što mašyna vybuchnie, jon padbieh da jaje, adšpiliŭ kiroŭcu ad kresła, vyzvaliŭ jaho i adciahnuŭ na niekalki mietraŭ. Nieŭzabavie pryjechali pažarnyja, palicyjanty i miedyki — ahoń byŭ patušany, a paciarpieły dastaŭleny ŭ balnicu z traŭmami i apiokami.
