Na ŭradavym sajcie źjaviłasia cikavaja infarmacyja: «U 2015 hodzie mabilnyja hrupy mytnych orhanaŭ na biełaruska-rasijskim učastku miažy praduchilili sproby pieramiaščeńnia tavaraŭ z parušeńniem zakanadaŭstva na sumu Br90 młrd, paviedamili BiełTA ŭ pres-słužbie DMK.
«Biełaruskija mytniki na pastajannaj asnovie pravodziać manitorynh uvozu i vyvazu tavaraŭ nie tolki na źniešnim kontury biełaruskaj miažy Jeŭrazijskaha ekanamičnaha sajuza, ale i na biełaruska- rasijskim učastku dziaržmiažy. Siłami mabilnych hrup mytnych orhanaŭ na biełaruska-rasijskim učastku dziaržmiažy spyniajucca sproby pieramiaščeńnia tavaraŭ z parušeńniem zakanadaŭstva», — padkreślili ŭ pres-słužbie. U DMK raspaviali, što pry vyvazie ź Biełarusi ŭ Rasiju, jak praviła, vyjaŭlajucca parušeńni, źviazanyja ź pieramiaščeńniem tavaraŭ «sankcyjnych» hrup. U 2015 hodzie vyjaŭlena bolš za 200 pravaparušeńniaŭ na sumu Br49 młrd pry vyvazie tavaraŭ, jakija pryznačalisia rasijskim spažyŭcam.
«U metach abarony biełaruskaha spažyŭca ad uvozu niedabrajakasnaj pradukcyi byli taksama spynieny nieadnarazovyja sproby ŭvozu tavaraŭ bieź nieabchodnych tavarasupravadžalnych dakumientaŭ, u tym liku fitasanitarnych, vieterynarnych siertyfikataŭ.
Tak, u 2015 hodzie spyniena 225 sprob uvozu ŭ Biełaruś z terytoryi Rasii miasa, ryby, małočnaj pradukcyi, harodniny, sadaviny, arechaŭ i inšych tavaraŭ z parušeńniami, čaściakom u dačynieńni da ich jakaści, a taksama biez najaŭnaści nieabchodnych tavarasupravadžalnych dakumientaŭ na sumu bolš jak Br40 młrd».
Paśla pračytańnia paviedamleńnia pres-słužby DMK ŭźnikajuć pytańni: Chto płacić abo dapłočvaje mytnikam Biełarusi za achovu ekanamičnaj prastory Rasiei? I druhoje pytańnie: ci majuć prava mytniki Biełarusi pracavać pa sumiaščalnictvie ŭ intaresach inšaj dziaržavy?
Jak traplaje sankcyjny dla Rasii tavar na miažu Biełarusi i Rasii? Naŭrad ci jaho desantujuć na parašutach kantrabandysty. Značyć, hety tavar prachodzić miažu Biełarusi z krainami ES i Ukrainy. A jak, chočacca spytacca? Nie praz tyja ž mytni? Cikava viedać i los kanfiskavanaha tavaru. Jaho viartajuć da zychodnaha pastaŭščyka? A moža, sadavinu i harodninu pieradajuć dzieciam u sadki? Ci nie aznačaje praca mytnikaŭ na miažy z Rasijaj kaniec Mytnaha i Jeŭrazijskaha sajuzaŭ abo jaho zamarozku?
Vielmi važnaje pytańnie nacyjanalnaj biaśpieki: a ci łoviać biełaruskija mytniki narkotyki na miažy z Rasijaj? Kali nie, to čamu?
Voś taki voz pytańniaŭ na paviedamleńnie pres-słužby DMK. Chutčej za ŭsio, adkazy na hetyja pytańni my nie daviedajemsia. Napeŭna, na ich lažyć piačatka dziaržaŭnaj tajamnicy. A toj, chto zadaje hetyja pytańni, moža patrapić u razrad špijonaŭ. Tolki voś pytańnie: jakoj krainy?
