Urad Irana ŭchvaliŭ pavyšeńnie zdabyčy nafty ŭ krainie na 500 tysiač baralaŭ u sutki. Rasparadžeńnie ab pavieličeńni vytvorčaści padpisana siońnia.
Jak paviedamlaje Reuters, infarmacyju paćvierdziŭ namieśnik ministra naftavaj pramysłovaści Irana Raknadzina Džavadzi. Pavyšeńnie zdabyčy nafty stała mahčymym paśla źniaćcia mižnarodnych sankcyj ź Isłamskaj Respubliki Iran.
Ministerstva nafty Irana paviedamiła, što kraina maje namier viarnuć sabie raniejšyja pazicyi na mižnarodnym rynku i da vosieni źbirajecca pavialičyć ekspart syroj nafty da 2 młn baralaŭ u dzień. Padčas dziejańnia sankcyj Iran ekspartavaŭ kala 1 młn baralaŭ nafty ŭ dzień, u asnoŭnym u Kitaj, Indyju, Turcyju, Japoniju i Paŭdniovuju Kareju.
Miž tym padzieńnie suśvietnych koštaŭ na naftu paskoryłasia. Košt košyka APIEK źniziŭsia da $24,74 za baral — minimumu za apošnija 13 hadoŭ. Amierykanski bank Morgan Stanley pierahledzieŭ prahnoz koštu nafty ŭ 2016-2017 hadach u bok panižeńnia. Novy prahnoz koštu nafty marki Brent ŭ 2016 hodzie ad analitykaŭ Morgan Stanley składaje $41,9 za baral (raniejšy prahnoz — $51,9).
16 studzienia krainy MAHATE atrymali finalny dakład ekśpiertaŭ ahienctva pa iranskaj jadziernaj prahramie, papiaredni aficyjnamu pačatku jaje realizacyi. U dakumiencie paćviardžałasia, što iranski bok vykanaŭ svaje abaviazacielstvy ŭ ramkach pahadnieńnia pa jadziernaj prahramie. Paśla hetaha pradstaŭnik Irana ŭ APIEK Miechdzi Asali zajaviŭ, što ŭzrovień zdabyčy pavialičycca na 500 tysiač baralaŭ u dzień, a nieŭzabavie paśla hetaha — jašče na 500 tysiač.
Hladzicie taksama: Sabiekošt iranskaj nafty — $10 za baral
