U pastanovie, jakaja była vyniesienaja zahadčykam siektara № 2 M.M. Hastełam 4 studzienia 2016 hoda, u pryvatnaści ŭkazana, što ŭ vytvorčaści adździeła prymusovaha vykanańnia Partyzanskaha rajona h.Minska na vykanańni znachodzicca vykanaŭčy list № 1-978/2011 ad 24.11.2011 suda Pieršamajskaha rajona h. Minska ab nakiravańni ŭ košt kanfiskacyi majomaści Alesia Bialackaha 18/100 doli ŭ pravie ŭłasnaści na kvateru, u jakoj jon stała pražyvaje sa svajoj siamjoj. U metach zabieśpiačeńnia ažyćciaŭleńnia vykanaŭčych dziejańniaŭ na dadzienuju majomaść nakładzieny aryšt.
Admietna, što hety vykanaŭčy list byŭ vydadzieny ŭ adździeł prymusovaha vykanańnia tolki 14 śniežnia 2015 hoda.
Varta nahadać, što, zhodna z prysudam suda Pieršamajskaha rajona h. Minska, 24 listapada 2011 hoda Aleś Bialacki byŭ asudžany da 4 hadoŭ i 6 miesiacaŭ pazbaŭleńnia voli z kanfiskacyjaj majomaści, jakaja naležała jamu na pravie ŭłasnaści – u tym liku kvatery, u jakoj znachodziŭsia ofis zakrytaha ŭładami pravaabarončaha centra «Viasna».
Jašče da suda nad pravaabaroncam na ofis arhanizacyi byŭ nakładzieny aryšt. 26 listapada 2012 hoda jon byŭ apiačatany sudovymi vykanaŭcami suda Pieršamajskaha rajona h. Minska (akt vopisu majomaści ad 26.11.2012 h.), usia majomaść arhanizacyi, jakaja tam znachodziłasia, była kanfiskavanaja i vyviezienaja. U suviazi ź niemahčymaściu karystańnia ofisam, pravaabaroncy byli vymušanyja pakinuć jaho.
U vyniku abskardžańniaŭ rašeńniaŭ ab kanfiskavanaj majomaści, pavodle rašeńnia suda Partyzanskaha rajona h. Minska ad 4 lipienia 2012 hoda, aryšt z doli ŭ kvatery, u jakoj pražyvaŭ Aleś sa svajoj siamjoj, byŭ źniaty.
Takim čynam, padobna, što praz čatyry hady paśla vyniasieńnia prysudu Alesiu Bialackamu ułady vyrašyli kanfiskavać nie tolki kvateru, u jakoj mieściŭsia ofis arhanizacyi, ale i faktyčna pazbavić pravaabaroncu miesca žycharstva.
Aleś Bialacki nie vyklučaje, što pryčynaj raptoŭnaj aktyŭnaści miniusta moh stać niadaŭni zvarot Mižnarodnaj fiederacyi za pravy čałavieka da biełaruskich uładaŭ z nahody nievykanańnia rašeńnia Kamiteta pa pravach čałavieka AAN pa jaho spravie.
«Mnie padajecca, hetaja pastanova ab kanfiskacyi moža być źviazanaja z tym, što na adras Ministerstva zamiežnych spraŭ byŭ nakiravany zvarot ab nievykanańni patrabavańniaŭ Kamiteta pa pravach čałavieka AAN pa majoj kryminalnaj spravie. Adnym z takich patrabavańniaŭ da biełaruskich uładaŭ źjaŭlajecca anulavańnie majoj sudzimaści. Mahčyma, našaja aktyŭnaść na mižnarodnym uzroŭni mahła vyklikać takuju reakcyju z boku ŭładaŭ – patrabavańnie ab vykanańni sudovaha rašeńnia čatyrochhadovaj daŭniny», — kaža Aleś Bialacki.
Pravaabaronca abskardziŭ pastanovu ab kanfiskacyi ŭ sudzie.
«U mianie była mahčymaść abskardzić dadzienuju pastanovu, i ja heta zrabiŭ, spasyłajučysia na toj fakt, što ŭ hetaj kvatery žyvu ja razam z žonkaj», - paviedamiŭ Aleś Bialacki.
