Usie biełaruskija banki źnizili staŭki pa aščadnych kartach. Hetaje rašeńnie pryniataje pa rekamiendacyi Nacbanka, paviedamlajuć svaim klijentam kamiercyjnyja banki.
U paviedamleńni bankaŭ havorycca, što z 15 studzienia staŭka pa rublovych aščadnych kartach źnižanaja z 15% da 3% hadavych, pa valutnych ŭstanoŭlenaja na ŭzroŭni 0,2% hadavych.
Srodki, jakija klijenty zachoŭvali na aščadnych kartach, banki prapanujuć raźmiaščać na terminovych depazitach.
Tak, «Biełahraprambank» u minułuju piatnicu adnačasova sa źnižeńniem stavak pa aščadnych kartach vyvieŭ novy terminovy adzyŭny ŭkład @gro ŭ biełaruskich rublach, raźmiaścić jaki trymalniki płaciežnych kartak mohuć, nie vychodziačy z chaty abo ofisa.
Padobnyja prapanovy vyvieli na rynak i inšyja banki. Tak, biełaruski «Alfa-Bank» na minułym tydni «ŭ jakaści alternatyvy» aščadnym kartkam prapanavaŭ ich trymalnikam aformić novy adzyŭny ŭkład.
Biełaruskija ekanamisty adznačajuć, što aščadnyja karty, staŭki pa jakich za apošni miesiac rezka źnizilisia (z 25% da 3%), byli najbolš zručnym praduktam dla nasielnictva.
«Hałoŭny plus aščadnych kartak składaŭsia ŭ tym, što možna było zachoŭvać źbieražeńni, atrymlivać dachod, i ŭ luby momant u vypadku nieabchodnaści źniać hrošy z rachunku», — kanstatuje ekśpiert Biełaruskaha ekanamičnaha daśledča-adukacyjnaha centra (BEROC) Kaciaryna Barnukova.
Na dumku finansavych analitykaŭ, rekamiendacyja Nacbanka rezka źnizić staŭki pa aščadnych kartach abumoŭlenaja realizacyjaj pryniataha ŭ listapadzie 2015 hoda dekreta № 7, jaki matyvuje ŭkładčykaŭ raźmiaščać srodki ŭ bankach na praciahły termin.
«Nacbank raniej pradekłaravaŭ, što bankaŭskaja sistema zacikaŭlena ŭ srodkach nasielnictva, jakija raźmieščanyja na praciahły termin. U hetym sensie aščadnyja karty, srodki ź jakich klijenty mahli źniać u luby momant, nie ŭpisvalisia ŭ novyja praviły hulni na depazitnym rynku», — ličyć starejšy analityk foreks-brokiera Forex Slub Valeryj Pałchoŭski.
