Asambleja niaŭradavych demakratyčnych arhanizacyj (NDA) nazvała łaŭreataŭ siomaj premii «Čempijony hramadzianskaj supolnaści». Cyrymonija ŭznaharodžańnia adbyłasia viečaram 15 studzienia ŭ Minsku.
Premijaj «Čempijony hramadzianskaj supolnaści» ŭznaharodžvajucca vybitnyja asoby, arhanizacyi, a taksama adznačajucca padziei, jakija byli znakavymi dla raźvićcia treciaha siektara Biełarusi ŭ minułym hodzie. Jany vyznačajucca šlacham hałasavańnia 43 členaŭ rabočaj hrupy Asamblei NDA ź liku pradstaŭnikoŭ roznych arhanizacyj, a taksama 71 śpiecyjalna zaprošanym ekśpiertam ź liku lidaraŭ NDA, žurnalistaŭ, jakija pišuć ab trecim siektary, i łaŭreataŭ premii.
Zvańniem «Hramadski lidar hoda» ŭznaharodžanaja biełaruskaja piśmieńnica, łaŭreat Nobieleŭskaj premii pa litaratury za 2015 hod Śviatłana Aleksijevič.
U naminacyi «Kampanija hoda» adznačanaja kampanija salidarnaści z kadetami Bresckaha abłasnoha kadeckaha vučylišča. 16 kastryčnika ŭ sacsietcy «UKantakcie» było apublikavanaje fota čatyroch kadetaŭ, na jakich pad formiennym adzieńniem byli nadzietyja majki z hierbam «Pahonia». Fota pieradrukavali ŚMI, a paźniej ź`iaviłasia infarmacyja pra mahčymaje adličeńnie kadetaŭ z vučylišča.
Pieramožcam u naminacyi «Novaja inicyjatyva» stała sieryja pierformansaŭ u padtrymku invalidaŭ. Udzielniki akcyi demanstravali na praciahu dvuch dzion, što Minsk zastajecca zakrytym dla invalidaŭ horadam.
Najbolš zaŭvažnaj rehijanalnaj padziejaj minułaha hoda, pa viersii Asamblei NDA, stała achova bieraha voziera Bałduk. Hetaja akcyja była arhanizavanaja ekołahami i miascovymi žycharami, jakija pratestavali suprać budaŭnictva carkvy.
Stryt-art-fest Urban Myths atrymaŭ hanarovaje zvańnie «Kreatyŭ hoda». Udzielniki akcyi pry dapamozie hrafici imknulisia ź niezvyčajnaha boku pakazać haradskoje asiarodździe.
U naminacyi «Partniorstva hoda» pieramahła inicyjatyva humanitarnaha maršrutu «Biełaruś — ATA».
Uznaharodu «Harbuz» hoda», jakaja ŭručajecca za niehatyŭnyja dziejańni ŭ dačynieńni da arhanizacyj hramadzianskaj supolnaści i ich pradstaŭnikoŭ, atrymała Ministerstva infarmacyi za źniščeńnie knihi ciapier niabožčyka Vitala Silickaha «Doŭhaja daroha da tyranii: postkamunistyčny aŭtarytaryzm i baraćba za demakratyju ŭ Sierbii i Biełarusi».
U naminacyi «Žurnalist abo miedyja hoda» pieramoh błohier i haradski aktyvist Anton Matolka.
Najlepšym sajtam NDA, pavodle viersii arhanizataraŭ premii, staŭ resurs adukacyja.info.
