Kožny biełarus maje prava vučycca na luboj ź dźviuch dziaržaŭnych movaŭ, zajaviła 12 studzienia na pres-kanfierencyi ŭ Minsku načalnik upraŭleńnia pa spravach moładzi Ministerstva adukacyi Natalla Pšaničnaja.
«U nas dźvie dziaržaŭnyja movy, kožny vybiraje svaju i maje prava na joj vučycca», — skazała jana.
Pavodle słoŭ pradstaŭnika Minadukacyi, baćki, jakija žadajuć, kab ich dzicia vučyłasia na biełaruskaj movie, pavinny ŭ svajoj zajavie ab pryjomie dziciaci ŭ pieršy kłas adznačyć žadanuju movu navučańnia.
«Luby baćka piša zajavu: «Ja prašu pryniać u pieršy kłas takoj voś škoły na takoj voś movie», jakaja budzie razhladacca, — adznačyła jana. — Biezumoŭna, kali vašaja zajava budzie adzinaj, to pad adnaho čałavieka kłas adkryvać nie buduć. Mahčyma, u susiedniaj škole ŭžo farmirujecca taki kłas, i vam prapanujuć pajści tudy».
Pšaničnaja padkreśliła, što ŭ krainie adkryvajucca biełaruskija kłasy, u dziciačych sadkach jość biełaruskamoŭnyja hrupy, u Minsku «dastatkova biełaruskamoŭnych himnazij».
«Było b žadańnie ŭ našych baćkoŭ heta rabić, tamu što kadry ŭ nas padrychtavanyja na vysokim uzroŭni», — skazała čynoŭnica.
U svaju čarhu namieśnik ministra adukacyi Viktar Jakžyk, adkazvajučy na pytańnie ab vynikach niadaŭniaj sustrečy ź ministram adukacyi skulptara Hienadzia Łojki, jaki dabivajecca dla svajoj dački navučańnia ŭ mastackim licei na biełaruskaj movie, adznačyŭ: «Spadaru Łojku było prapanavana, nakolki mnie viadoma, nastupnaje: unieści kankretnyja prapanovy pa źmianieńni zakanadaŭstva, kali jany jość».
