SpaceX paśla niekalkich niaŭdałych sprob usio ž udałosia pasadzić pieršuju stupień rakiety Falcon 9. Prystupka pryziamliłasia na bietonnuju płatformu na mysie Kanavierał.
Voś tak vyhladała pasadka ź viertalota
A voś z płatformy
Zasnavalnik SpaceX Iłon Mask apublikavaŭ fatahrafiju i videa pieršaj prystupki Falcon 9, što pryziamliŭsia na mysie Kanavierał. «Sardečna zaprašajem nazad, dzietka», - napisaŭ jon.
Pasadzić stupień rakiety — druharadnaja zadača SpaceX. Hałoŭnaj zadačaj było dastavić na arbitu 11 spadarožnikaŭ. Kampanija vykanała jaje paśpiachova. Zapusk 22 śniežnia staŭ pieršym paśla červieńskaj niaŭdačy, kali rakieta z hruzam dla MKS vybuchnuła ŭ pavietry.
***
SpaceX raniej sprabavaŭ pasadzić pieršuju stupień rakiety na marskuju płatformu. Rakieta traplała ŭ jaje, ale zaŭsiody zavalvałasia. U vyniku ŭ kampanii vyrašyli sadžać rakietu na pavierchniu ziamli. U SpaceX ličać, što kali pieršuju prystupku možna budzie zapravić i vykarystoŭvać znoŭku, to heta značna źnizić vydatki na zapusk. Pakul takoha nie prarabiŭ nichto ŭ śviecie — va ŭsich kampanij, jakija ciapier pravodziać zapuski na arbitu, rakiety padajuć u akijan. Zrešty, rakietu, jakaja viarnułasia 22 śniežnia, vykarystoŭvać nie buduć: Mask zajaviŭ, što choča pakinuć jaje na Ziamli dla historyi.
Pryvatnaj arbitalnaj kampanii Blue Origin u śniežni 2015 atrymałasia viertykalna pasadzić svoj subarbitalny karabiel. Ale pa słovach Iłana Maska, jość vialikaja roźnica pamiž subarbitalnymi palotami i palotami ŭ kosmas.
Kampanija SpaceX dastaŭlaje hruzy na MKS pa zamovie NASA. Akramia taho, jana zaklučyła z amierykanskim ahienctvam dahavor na piłatavany palot na kaśmičnuju stancyju. Dla piłatavanych palotaŭ kampanija raspracoŭvaje karabiel Crew Dragon.
