Dziaržaŭnaja duma RF pryniała zakonaprajekt, jaki daje Kanstytucyjnamu sudu Rasii prava pryznavać niemahčymym vykanańnie ŭ krainie rašeńniaŭ mižnarodnych sudoŭ. Pakiet papravak u fiederalny zakon «Ab Kanstytucyjnym Sudzie RF» byŭ pryniaty adrazu ŭ druhim i trecim čytańni.
U pieršym čytańni papraŭki byli ŭchvalenyja try dni tamu.
Pryniaty Dumaj zakonaprajekt pavodle zadumy aŭtaraŭ pavinien «zabiaśpiečyć pravavy suvierenitet» Rasii i «supraćstajać tendencyjnym rašeńniam» mižnarodnych sudoŭ.
Adzin z aŭtaraŭ papravak, adzinaros Uładzimir Plihin, nastojvaje, što papraŭki nie staviać pad pytańnie pazicyju Rasii datyčna vykanańnia mižnarodnych abaviazacielstvaŭ. «Usia naša dziejnaść nakiravanaja na vykanańnie mižnarodnych damovaŭ», — cytuje Plihin ahienctva Interfaks.
Suprać pryniaćcia zakonaprajekta prahałasavali troje deputataŭ. «Suprać byli ja, (Siarhiej) Piatroŭ i (Ilja) Panamaroŭ (dakładniej, jaho kartka ŭ majoj ruce na padstavie davieranaści)», — napisaŭ u «Fejsbuku» člen frakcyi «Spraviadlivaja Rasija» Dźmitryj Hudkoŭ pa vynikach hałasavańnia. Za dakumient prahałasavali 436 deputataŭ.
U siaredzinie lipienia Kanstytucyjny sud RF pastanaviŭ, što Rasija moža nie vykonvać rašeńni Jeŭrapiejskaha suda pa pravach čałavieka, kali pry hetym parušajucca asnoŭnyja kanstytucyjnyja normy.
U červieni bolš za 90 deputataŭ Dziarždumy źviarnulisia ŭ Kanstytucyjny sud pa tłumačeńni pra toje, jak pavinny prymianiacca ŭ Rasii rašeńni Jeŭrapiejskaha suda pa pravach čałavieka.
Miesiacam raniej u ministerstvie justycyi Rasii zajavili, što ličać zaŭčasnym vykanańnie pastanovy JESPČ, zhodna ź jakim Rasija pavinna vypłacić byłym akcyjanieram JUKASa 1,86 młrd dalaraŭ.
