Prezident Polščy Andžej Duda nakłaŭ vieta na źmieny da Zakonu ab nacyjanalnych i etničnych mienšaściach i ab rehijanalnych movach. Pra heta paviedamlajecca na sajcie Kancylaryi prezidenta.
U pryvatnaści, jak adznačajecca ŭ paviedamleńni, sumnievy ŭ kiraŭnika polskaj dziaržavy vyklikaŭ artykuł, jaki dazvalaje miascovym orhanam samakiravańnia na ŭzroŭni pavietaŭ, akramia aficyjnaj movy, karystacca movaj mienšaściaŭ.
Andžej Duda abhruntavaŭ svajo rašeńnie adsutnaściu finansavych padlikaŭ dla biudžetaŭ pavietaŭ i hmin, źviazanych z uviadzieńniem i vykarystańniem na ich terytoryi dapamožnaj movy.
Mahčymaść vykarystańnia, akramia aficyjnaj movy, movy mienšaściaŭ u pavietach u jakaści dapamožnaj była samym važnym artykułam u zakonie.
Zhodna ź dziejnym zakanadaŭstvam, takaja mahčymaść isnuje tolki pry razhladzie dakumientaŭ orhanami hminy. Źmieny pavinny byli dać mahčymaść hramadzianam-pradstaŭnikam nacmienšaściaŭ źviartacca ŭ orhany samakiravańnia ŭ piśmovaj abo vusnaj formie, a taksama atrymlivać adkazy na ich rodnaj movie.
Akramia taho, pa zvarocie nacyjanalnaj abo etničnaj mienšaści saviet hminy moh by taksama pryniać rašeńnie ŭ formie pastanovy ab prysvajeńni druhoj nazvy miascovaści abo abjekta na movie mienšaściaŭ.