Z 17 kastryčnika Facebook pastanaviŭ papiaredžvać karystalnikaŭ ab aktyŭnaści, što nahadvaje ataku «spansavanych dziaržavaj aktyvistaŭ». Kali administracyja zapadozryć, što na akaŭnt nacelenaja ataka dziaržaŭnych słužbaŭ, ci što akaŭnt užo ŭzłamany, karystalnik atrymaje paviedamleńnie, što na nastolnaj versii sajtu budzie mieć taki vyhlad:
«My robim heta tamu, što takija vidy napadaŭ, jak praviła, bolš prasunutyja i niebiaśpiečnyja za inšyja, — tłumačyć u błohu Aleks Statmas, hałoŭny aficer biaśpieki Facebook. — I my nastojliva raim paciarpiełym pryniać nieabchodnyja miery, kab zabiaśpiečyć usie svaje anłajn-akaŭnty».
Takoje paviedamleńnie, jak śćviardžaje Statmas, nie źviazanaje z prablemami ŭ biaśpiecy samoha Facebook: jano moža śviedčyć pra škodnaje prahramnaje zabieśpiačeńnie na kamputary albo smartfonie karystalnika. Ludzi, jakija pabačać takoje paviedamleńnie, musiać zrabić nastupnaje:
— Źmianić parol ad akaŭnta. Pažadana rabić parol doŭhim i składanym, ź ličbami, vialikimi i małymi litarami. Naprykład, «mkV1S2Knuh», što lohka zapomnić jak «moj kot VAŚKA naradziŭsia ŭ 12 hodzie».
— Uklučyć dvuchetapnuju aŭtentyfikacyju: paćvierdžańnie ŭvachodu u sacsietku praź biaspłatnaje SMS, u jakim karystalniku prychodzić dadatkovy kod. U takim razie złamyśniku pryjdziecca skraści nia tolki parol ad sacsietki, ale i telefon karystalnika.
— Pravieryć kamputar na virusy i škodnyja prahramy: spampavać adzin ź biaspłatnych antyvirusaŭ albo nabyć płatny, spampavać albo nabyć srodak ad škodnych (malware) prahramaŭ.
— Nadalej vykonvać bazavyja praviły biaśpieki ŭ internecie, a važnuju infarmacyju pieradavać praz srodki, što ciažka ŭzłamać.
«Kab abaranić cełasnaść našych metadaŭ i pracesaŭ, my časta nie zmožam tłumačyć, jak my źviazvajem peŭnyja ataki i padazronych napadnikaŭ, — dadaje Statmas u błohu. — Tym nia mienš, my planujem vykarystoŭvać heta papiaredžańnie tolki ŭ sytuacyjach, kali jość mocnyja dokazy našych vysnovaŭ».
