president.gov.by
«Naša Niva»: Jakuju metu pieraśledvaŭ Alaksandr Łukašenka, kali nakiroŭvaŭsia na siesiju Hienieralnaj Asamblei AAN? Zdajecca, jon nie byŭ tam šmat hadoŭ.
Valeryj Kavaleŭski: Jon byŭ dziesiać hadoŭ tamu — jeździć na jubilejnyja siesii. Tut važnaja i AAN jak šmatbakovaja płatforma dla abmierkavańnia pytańniaŭ, ale asabliva važnyja dvuchbakovyja sustrečy. Tut možna sustrecca z pradstaŭnikami krain, ź jakimi ŭ inšych umovach sustrecca nie zaŭsiody mahčyma. Aficyjnyja krynicy paviedamlajuć pra praviadzieńnie sustreč z pradstaŭnikami Dziarždepartamienta ZŠA, MVF, jeŭrapiejskich krain.
«NN»: Ci moža dać niejki vynik sustreča z pradstaŭnikami MVF?
VK: Pytańnie da biełaruskaj dziaržavy. Ci znojduć jany ŭ sabie siły, žadańnie, kab ažyćciaŭlać reformy. Majo voka začapiła toje, što aficyjnyja krynicy adkryta kazali pra acenki MVF adnosna Biełarusi, rekamiendacyi pieraaryntavać ekanomiku. Raniej usio heta nie ahučvałasia, u nas było ŭsio dobra.
«NN»: A jak možna acanić pramovu Łukašenki. Mnohim padałosia, što jana havaryłasia, kab spadabacca Rasii?
VK: U hetym i sens šmatbakovaj dypłamatyi, kali kiraŭniki dziaržaŭ pavinny kazać słovy, što adpaviadajuć ich intaresam. Kali Łukašenka vykazvaŭsia ab pytańniach siamji, ab naviazanych madelach dziaržaŭnaści, kazaŭ ščyra, ab čym balić. Razam z tym u kułuarnych razmovach z pradstaŭnikami zachodnich krain słovy vybirajucca inšyja. Nie vyklučaju, što mahło navat abmiarkoŭvacca pytańnie raźmiaščeńnia rasijskaj avijacyjnaj bazy ŭ Biełarusi. Dla ŭnutranaj aŭdytoryi jon pavinien być paśladoŭnym. Uvohule, Łukašenka lubić havaryć toje, što spadabajecca publicy. U AAN taksama šmat krain niezadavolenych prasoŭvańniem demakratyi.
«NN»: Pramovy ŭ AAN robiacca dla ŭnutranaha spažyŭca ci śvietu?
VK: Pramova Abamy była dla inšych krain, jaho zadača była zadać ton mižnarodnych adnosin siońnia. U Abamy vymaloŭvajecca strohaja linija, što pytańni treba vyrašać dyjałoham, a nie zbrojaj. «My hatovy supracoŭničać i z Rasijaj, i ź Iranam, i z Kubaj», — kazaŭ Abama. Dypłamatyja — zamiest vajny.
Ale heta nie biełaruski vypadak. My bolš zacyklenyja na svaim rehijonie. Nie dumajem, što adbyvajecca ŭ Łacinskaj Amierycy, Afrycy.
U ZŠA vielmi šmat abmiarkoŭvajecca sustreča Abamy i Pucina. Jana zastajecca centralnaj u ŚMI. Bo na hetaj sustrečy abmiarkoŭvalisia pytańni Siryi i Ukrainy.
«NN»: Hety vizit Łukašenki možna razhladać jak praciah pieradvybarčaj kampanii?
VK: Heta vielmi dobra vyhladaje, salidna i navat śvieža dla našaj navat niecikavaj časam źniešniaj palityki.
«NN»: A jak tady vyhladaje prysutnaść małodšaha syna Łukašenki na pasiadžeńni?
VK: Heta niedarečna, kaniečnie. Takoha nie dazvalajuć sabie kiraŭniki inšych krain. Ja nikoli z takim nie sutykaŭsia. Heta vyhladaje dziŭna — pryvieści svaju siamju na pasiadžeńnie.
«NN»: Jakija hałoŭnyja vyniki možna zrabić z pajezdki?
VK: Vidavočna, što ŭ jaho šmat miortvanarodžanych inicyjatyvaŭ. Naprykład, intehracyja intehracyj. Kali Łukašenka havoryć pra tradycyjnuju siamju, to jon vielmi adstaje ad suśvietnych tendencyj. Kali havoryć pra sproby naviazvańnia demakratyi, to amierykancy ničoha nie naviazvajuć. Jany kažuć prosta — vykonvajcie svajo zakanadaŭstva. U Łukašenki zastajecca kandovy padychod da śvietu vakoł jaho, jon nie bačyć, čym śviet jamu moža dapamahčy.
Što tyčycca dvuchbakovych sustreč, to heta zastajecca krychu za dužkami, my pra heta daviedajemsia paźniej. Ale taja trajektoryja, jakuju my bačym, što Zachad hatovy ŭsprymać Łukašenku takim, jaki jon jość, budzie zachoŭvacca. Budzie bolš uvahi tamu, kab sam režym źmianiaŭsia, razam z Łukašenkam, kab adpuskalisia niejkija hajki, kab byli palapšeńni ŭ palitycy i ekanomicy.
Dobra, što jon tam byŭ, paŭdzielničaŭ. Mnohija krainy nie ŭdzielničali, mo nie zmahli nabrać šmat dvuchbakovych cikavych sustreč. Ź Biełaruśsiu hatovy sustrakacca — i heta dobra. Na takich važnych mierapryjemstvach naša prysutnaść pavinna być abaviazkovaj.
