Polskaja Grupa Atlas — bujny va Uschodniaj Jeŭropie vytvorca budaŭničych materyjałaŭ — usio hłybiej inkarparyrujecca ŭ biełaruskuju ekanomiku. Zapuściŭšy hetaj viasnoj druhi zavod pad Minskam, chołdynh płanuje pabudavać i treciuju vytvorčaść.
Grupa Atlas, uładalnikami jakoj źjaŭlajucca Andžej Valčak i Hžehaž Hžiełak (pa viersii Wprost uvachodziać u pieršuju sotniu samych bahatych palakaŭ), zrabiła pieršyja inviestycyi ŭ Biełarusi ŭ 2009 hodzie. Akcyjaniery Atlas prykładna za 4 młn dalaraŭ nabyli ŭ biełaruskaha biźniesmena Ramualda Maciukieviča kantrolny pakiet hrodzienskaha vytvorcy suchich budaŭničych sumiesiaŭ «Tajfun». U 2011 hodzie, ukłaŭšy hrošy ŭ jaho madernizacyju i pašyreńnie, vytvorčaść adnavili. U 2013 hodzie dla budaŭnictva jašče adnaho zavoda ŭ SEZ «Minsk» była zarehistravanaja kampanija «Tajfun Izalacyja». Uviesnu hetaha hoda vytvorčaść była ŭviedzienaja ŭ ekspłuatacyju.
«Sioleta my zapuścili novuju vytvorčaść u Biełarusi — zavod, jaki vypuskaje ekspandziravany pierlit. U Polščy taksama my źjaŭlajemsia vytvorcam ekspandziravanaha pierlitu», — raspavioŭ internet-resursu inwestor.newseria.pl vice-prezident pa raźvićci Grupa Atlas Jacek Michalak.
Jak adznačajecca, zapusk zavoda dazvoliŭ admovicca ad pastavak hetaha materyjału z Rasii. Ciapier vytvorčyja patreby chołdynhu ŭ Biełarusi zabiaśpiečvajucca miascovaj vytvorčaściu, a taksama pastaŭkami z zavodaŭ Atlas ŭ Polščy.
Akramia taho, polski inviestar vychodzić na biełaruskim rynku ŭ jašče adzin siehmient.
«U dadzieny momant my zapuskajem novy zavod pa vytvorčaści papiery ŭ Biełarusi», raspavioŭ Jacek Michalak, padkreśliŭšy, što takim čynam kampanija vychodzić u novy dla siabie siehmient. «My spadziajemsia, što damožamsia pośpiechu», — adznačyŭ jon.
U zaležnaści ad siehmienta Grupa Atlas kantraluje ad 50 da 70% biełaruskaha rynku, vyrablajučy štohod kala 350 tys. Ton pradukcyi. Častka pradukcyi ekspartujecca ŭ Rasiju i Ukrainu. Akramia Polščy i Biełarusi, u Grupa Atlas jość vytvorčyja mahutnaści ŭ Rumynii. Uvieś chołdynh štohod vyrablaje pradukcyi na 1,1 młrd złotych, na biełaruskija i rumynskija zavody prypadaje kala 250 młn złotych.
