Pračytaŭ siońnia ŭ adnaho čałavieka dobraj voli kamientar u styli «Usio, na što zdolnaja naša «apazicyja» — heta fotažaby» i abliŭsia horkaju ślazoju. Jak ža mianie zamiłoŭvajuć, zdajecca, niedurnyja ludzi, jakija bilet nie nabyvali, ale čakajuć puciovačku na Havai ci chacia by dvuchkasietny mahnitafon ad čarhovaj kamulacyi sportłato. «Nu vot my i prijechali, — zdravstvujtie, dievočki».
Jak pa turmach chadzić — dyk heta niachaj Statkievič, Sańnikaŭ, Michalevič, Labiedźka, Sieviaryniec i Daškievič. A jak na durniak vocat pachlabać — dyk nas pakličcie. Pry hetym, kab nie było sumna, možacie nas pakul pazabaŭlać, zavajavać našuju łajalnaść i simpatyju. I tady my abiacajem padumać, za kaho addać svoj hołas. Dyk voś, šanoŭny elektaracie, u situacyi, kali vybaraŭ niama, svoj hołas možaš demanstravać łasiam u Biełaviežskaj puščy ci na šou «Hołos Rośsii» v prajmtajm na piervomvtoromtrieťjem i kompotie.
Vynikaŭ ad biełaruskich palitykaŭ, jakija dziejničajuć pad jarmom dyktatury, moža damahacca toj, chto ŭ hetych ludziej inviestavaŭ.
Pakul mybiełarusymirnyjaludzi (patrebnaje padkreślić) sami nie pačniom inviestavać u biełaruskuju spravu albo svaje hrošy, albo svoj čas, albo zdaroŭje ci inšyja intangible assets, nie budzie nijakaj biełaruskaj palityki i paŭnavartasnych adnosinaŭ vybarcaŭ z palitykami.
Bieź inviestycyj nie moža być nijakich dyvidendaŭ. Bolej za toje, inviestycyi byvajuć całkam stratnymi — welcome to the real world of capital loss and gain. A pakul na samy pačatak, kupicie sabie paru-trojku akcyjaŭ AAT «Apazicyja», kab potym dapamahacca ad jaje mieniedžaraŭ vynikovaj spravazdačy za papiaredni inviestycyjny pieryjad.
