Pavažany spadar Staršynia, ź vialikaj cikavaściu pračytaŭ pieradruk Vašych słoŭ ź pieradačy «Kłub redaktaraŭ», jakaja vyjšła ŭ efir na telekanale «Biełaruś-1» 13 vieraśnia. Mienavita ź cikavaściu. Nie z abureńniem, chacia heta, moža, i było b bolš adekvatnaj reakcyjaj na Vašyja słovy.
Nie sa ździŭleńniem, bo žamčužnaja kalekcyja vykazvańniaŭ na tak šanavanym i papularnym siarod prostaha naroda kanale, jak «Biełaruś-1», užo daŭno nie ŭ stanie ničym ździvić.
Ale, dalboh, pakiniem u supakoi maje abureńnie i ździŭleńnie i vierniemsia da hałoŭnaha, a mienavita da Vašych słoŭ.
U vyšej zhadanaj pieradačy Vy nazvali biełaruskich zaŭziataraŭ našaj zbornaj — cytuju — «junymi nacystami». Nie budziem zasiarodžvać uvahu na ŭzrostavym pytańni, chacia kali b šanoŭny spadar ctaršynia asabista naviedaŭsia na stadyjon na matč zbornych Ukrainy i Biełarusi, ubačyŭ by na ŭłasnyja vočy nie tolki ŭzrostavy, ale i hiendarny razrez biełaruskaha hramadstva.
Naprykład, pobač sa mnoj, nie «junym» užo, 40-hadovym čałaviekam, stajali dźvie maładyja dziaŭčyny. Moža, u chatnim zaciššy jany i zajadłyja «nacystki», ale ź ich pavodzinaŭ na stadyjonie heta nijak nie vynikała.
Praanalizujem hałoŭnaje słova z frazy, jakoje ŭražvaje masštabam abvinavačvańnia.
Pavažany spadar Davydźka, patłumačcie, kali łaska, na jakoj padstavie i na jakich faktach Vy hurtam publična nazvali biełaruskich zaŭziataraŭ u Lvovie nacystami?
Nakolki ja razumieju, u vas jość nieasprečnyja dokazy ci to prynaležnaści naviedvalnikaŭ haściavoha siektara da farmalnych ci niefarmalnych nacysckich hrupovak, ci to ŭžyvańni padčas matča abo pierad im ci paśla jaho nacysckaj simvoliki, ci to publičnych nacystkich vykrykaŭ. Było b nadzvyčaj stasoŭna pradstavić hetyja dokazy šyrokaj publicy.
Sa svajho boku pierabiraju ŭ pamiaci ŭzrušalnyja momanty jednaści biełaruskich i ukrainskich zaŭziataraŭ futboła padčas pobytu na matčy ŭ Lvovie i nie mahu zrazumieć, što ž vyklikała ŭ Vas takuju reakcyju.
Nie mahu sabie ŭjavić, što, naprykład, Vy mahli b nazvać bieł-čyrvona-bieły, niekali dziaržaŭny, ściah — nacysckim. Ściah, pad jakim prymaŭ prysiahu na viernaść Biełaruskamu Narodu pieršy prezident Biełarusi spadar Alaksandr Łukašenka.
Ciažka sabie ŭjavić i toje, što Vy mahli b nazvać nacysckim sfarmulavany Jankam Kupałam łozunh «Žyvie Biełaruś». Heta prosta nie pamiaščałasia b u hałavie, kali b haściavy siektar u Lvovie, fan-siektar zbornaj Ukrainy i ŭvieś 33-tysiačny lvoŭski stadyjon chacieli b, kab Biełaruś žyła, a Vy mieli b inšaje mierkavańnie na hety kont.
Nie chočacca vieryć i ŭ toje, što sučasny adukavany čałaviek moža nie viedać, što łozunh «Słava Ukrainie» siahaje vytokaŭ aśpiracyj ukrainskaj niezaležnaści ŭ novaj historyi i źviazvać jaho z nacyzmam mohuć tolki prapahandysty tendencyjnych telepieradač.
Jašče mienš chočacca vieryć u toje, što Vy ŭsurjoz možacie ličyć pieśni biełaruskaha hurtu «Lapis Trubieckoj», «Try čarapachi» NRM, narodnuju «Kupalinku» ci typovyja biełaruskija fanackija kryčałki ŭ padtrymku zbornaj nacysckaj tvorčaściu. Heta było b ŭžo ŭvohule pa-za miežami — prynamsi majho ŭłasnaha — razumieńnia. Užyvajučy futbolnuju terminałohiju — pa-za hulnioj…
Byŭ jašče banier z prostym, ale adnaznačnym salidarnym źmiestam «Trymajciesia, braty». Chaciełasia b adznačyć, pavažany spadar Davydźka, što biełaruskija amatary futboła vykazali svaju salidarnaść ukrainskamu narodu ŭ rečyščy ahulnaha staŭleńnia Biełarusi da niaprostaj situacyi va Ukrainie, jakaja vyražałasia ŭ tym liku i aficyjna kiraŭnikom biełaruskaj dziaržavy na sustrečy ŭ Kijevie pry kancy 2014 hoda.
Cytuju: «Dla nas eto nie ihra. Nie tolko potomu, čto tovarooborot, a potomu, čto my sosiedi, my riadom živiem, my rodnyje ludi».
Źviarnicie ŭvahu, spadar staršynia, my z ukraincami — rodnyja ludzi. Niaŭžo Vy ličycie nacystami tych, chto zhodny z hetym tezisam Alaksandra Łukašenki?..
Pavažany Hienadź Branisłavavič, niahledziačy na Vašyja sproby adbić achvotu jeździć na matčy našaj kamandy i padtrymlivać jaje — my budziem heta rabić.
Budziem jeździć. I budziem śpiavać. I budziem bić novyja rekordy, tak jak ciapier, u Lvovie, pabili vyjazny rekord na hulniach zbornaj Biełarusi. A Vam jak staršyni Biełteleradyjokampanii moža nie zališnie było b padumać pra toje, što misijaj i zadačaj publičnaha telebačańnia jość pradstaŭleńnie roznych myślovych i śvietapohladavych płyniaŭ, a nie baraćba ź imi i nie ich nieapraŭdanaja dyskredytacyja.
I na zakančeńnie. Sa svajho boku stanoŭča patrabuju prynieści publičnyja prabačeńni biełaruskim amataram futboła, jakija 5 vieraśnia 2015 hoda prysutničali na adboračnym matčy Jeŭra-2016 pamiž zbornymi Ukrainy i Biełarusi ŭ Lvovie — za Vašy niespraviadlivyja i abraźlivyja abvinavačańni.
U inšym vypadku Vy nie pakiniecie mnie vybaru i pola manieŭru, i ja budu vymušany ŭziać na siabie rolu arhanizatara masavych pazovaŭ u abaronie hodnaści ŭ ramkach biełaruskaj sudovaj sistemy.
U lubym vypadku, prynamsi adzin pazoŭ budzie napeŭna.
