Fota: forum.grodno.net
Hrodna i Druskieniki źbirajucca pabudavać pamiž haradami vieładarožku. Pra heta siońnia na mižnarodnym inviestycyjnym forumie «Hrodna na skryžavańni hranic» paviedamiŭ žurnalistam mer Druskienikaŭ i prezident asacyjacyi samakiravańniaŭ Litvy Ryčardas Malinaŭskas, pieradaje BiełTA.
«My pracujem z Hrodna ŭžo šmat hadoŭ. U nas užo jość dośvied atrymańnia jeŭrapiejskich srodkaŭ na daśledavańnie enierhietyčnych patrebaŭ abodvuch haradoŭ, realizacyju niekalkich kulturnych prajektaŭ. My ŭžo pačali pracu nad sumiesnymi zajaŭkami na nastupny finansavy pieryjad. Majem cikavyja idei dla sumiesnaha prajekta ŭ śfiery daśledavańni ahulnaj historyi i stvareńnia novaha muzieja ŭ centry Hrodna.
Akramia taho, my pavinny davieści da kanca ideju źviazać dva našyja horady viełasipiednym maršrutam, dla hetaha treba pabudavać sučasnuju transhraničnuju vieładarožku», — skazaŭ Ryčardas Malinaŭskas i zaprasiŭ hrodziencaŭ čaściej pryjazdžać u litoŭski pabracim.
«U nas raźvita śfiera azdaraŭlenčych i turystyčnych pasłuh, a ŭ vas — vytvorčaść i pierapracoŭka. My vielmi dobra dapaŭniajem adzin adnaho, nie kankuryrujučy», — zaŭvažyŭ mer.
U svaju čarhu staršynia Hrodzienskaha harvykankama Miečysłaŭ Hoj padkreśliŭ, što dola litoŭskich kampanij siarod kampanij z zamiežnym kapitałam u Hrodnie składaje bolš za 30%. «Nam šmat čaho možna pieraniać u haradskich uładaŭ Druskienikaŭ u śfiery azielanieńnia, dobraŭparadkavańnia i pierśpiektyŭnaha raźvićcia horada», — skazaŭ Miečysłaŭ Hoj.
Miečysłaŭ Hoj i Ryčardas Malinaŭskas padpisali płan inviestycyjnaha i handlova-ekanamičnaha supracoŭnictva na 2015—2016 hady.
Ułady litoŭskaha horada Druskininkaj ŭpieršyniu prapanavali stvaryć 50-kiłamietrovuju viełasipiednuju trasu praź dziejučy pamiežny pierachod «Pryvałki» jašče ŭvosień 2009 hoda taksama na inviestycyjnym forumie ŭ Hrodnie, nahadvaje velogrodno.by.
