«Być u kryvi — heta zusim inšaje», — dadaje jon. — «U Biełarusi bajkot vybaraŭ niemahčymy», a krytyka apazicyi dla kampanii «Havary praŭdu» idzie tolki na karyść, — upeŭnieny Andrej Dźmitryjeŭ. — My ciapier nia źviazanyja ni radykalnaj rytorykaj BNF, ni imidžam apazicyi», — kaža jon.
Niekalki aktyvistaŭ kampanii «Havary praŭdu» pravodzili dzień viedaŭ 1 vieraśnia ŭ Vilni. Razam z sacyjołahami i ekśpiertami jany praciahvajuć abmiarkoŭvać, jak pravodzić vybarčuju kampaniju Taćciany Karatkievič. Na radzimie dla mnohich «Havary praŭdu» kančatkova pieratvaryłasia ŭ prajekt KDB, ale kiraŭnika kampanii Andreja Dźmitryjeva heta nie mocna pałochaje. Dźmitryjeŭ raspavioŭ Paŭłu Šaramietu, u čym sens udziełu Taćciany Karatkievič u prezidenckaj kampanii i čamu jamu važna dajści da kanca prezidenckaj honki, niahledziačy na abvinavačvańni ŭ supracoŭnictvie sa śpiecsłužbami.
«Uźnikaje adčuvańnie, što ad vas užo adviarnulisia usie ŭ biełaruskaj apazicyi — asobnyja lidary, cełyja partyi. Vy pieratvarajeciesia ŭ prakažonych biełaruskaj apazicyi. Na što Vy asabista i vaša kampanija «Havary praŭdu» u hetaj situacyi raźličvajecie?» — spytaŭsia Ŭ Andreja Dźmitryjeva Pavieł Šaramiet.
«Pa-pieršaje, ja b nie kazaŭ zanadta hučnych słoŭ. Heta vybary — emocyi bjuć praz kraj i kožny choča, kab mienavita na jaho źviarnuli ŭvahu, tamu kaža takija rečy, jakija, u jaho razumieńni, začepiać miedyi, i ŭsie pačnuć pra heta pisać.
U 2010 hodzie, kali my ŭspomnim, była taja ž samaja situacyja: usie kazali, što HP — heta sparadžeńnie piekła, jakoje piekła i finansuje, a potym vydatna farmavali kaalicyi i pracavali. Taksama budzie i hetym razam», — miarkuje Dźmitryjeŭ.
«Toje, što adbyvajecca, heta narmalny palityčny praces, — kaža jon. — Našy paplečniki pa demakratyčnaj kaalicyi [mižvoli] dapamahajuć Taćcianie zrabić tak, kab hramadstva bačyła jaje nie jak pradstaŭnika toj apazicyi, jakuju biełarusy nie lubiać z-za pastajannych svarak, a jak novy, alternatyŭny tvar.
Naprykład, rašeńnie BNF vyjści z kampanii škodzić reputacyi samoha BNF, ale dazvalaje Taćcianie skazać, što jana nie reprezientuje apazicyjnyja partyi, ale źjaŭlajecca alternatyvaj ciapierašniaj uładzie».
«Toje, što zrabiŭ Alaksiej Janukievič, heta mužny krok: jon achviaravaŭ svajoj reputacyjaj i reputacyjaj partyi, kab Karatkievič stała čystym kandydatam bieź niehatyvu, jaki ciahniecca šlejfam za apazicyjnymi partyjami», — miarkuje Dźmitryjeŭ.
«BNF syšoŭ, heta była apošniaja apazicyjnaja partyja, jakaja padtrymlivała Karatkievič aficyjna. Ale pry hetym BNF dapamoh sabrać podpisy, h.zn. hałoŭnaja zadača vykananaja — podpisy jość. Zaraz pačynajecca ahitacyja, kali treba kazać ab prahramie, ab niejkich svaich krokach, i my ciapier nie budziem źviazany pa rukach ni radykalnaj rytorykaj BNF, ni niehatyŭnym imidžam apazicyjnych partyj», — ciešycca Dźmitryjeŭ.
«Aktyŭ BNF z nami zastaniecca, — upeŭnieny jon. — My taksama budziem vystupać pad bieł-čyrvona-biełymi ściahami. My ŭsio roŭna budziem kazać pra biełaruskuju movu, tolki ŭ bolš miakkim farmacie. My kažam pra nieabchodnaść nie dapuścić rasijskich vajskovych baz u Biełarusi. Tolki zaraz my možam spakojna kazać tak, kab pačuła bolšaść biełarusaŭ».
«Važna toje, što fakt adbyŭsia, — dakazvaje Dźmitryjeŭ. — U demakratyčnych sił jość kandydat i, chočuć jany taho ci nie chočuć, ale dla bolšaści hramadstva Taćciana Karatkievič budzie kandydatam demakratyčnych sił. I siońnia prezidenckaja kampanija stanovicca vybaram pamiž Łukašenkam i Karatkievič, bo astatnich kandydataŭ nichto nie budzie ŭsprymać surjozna. I zadača zaklučajecca ŭ tym, jak mabilizavać pad Karatkievič jak maha bolš ludziej».
Na dumku Dźmitryjeva, apazicyja ŭsio adno nie mahła b kampanii Karatkievič dapamahčy.
Što da słovaŭ Uładzimira Niaklajeva, jaki nazvaŭ Dźmitryjeva ahientam KDB, Andrej adkazaŭ tak: «Mnie škada, što chtości pierakanaŭ Niaklajeva ci jon sam siabie pierakanaŭ mienavita ŭ takoj viersii padziej. Jana, mahčyma, mnohaje dla jaho tłumačyć, ale źjaŭlajecca absalutna pamyłkovaj. Ale adkazvać ciapier — to nakidvać na naš tradycyjny vientylatar, a jon chutka złamajecca ad taho bahaćcia dziarma, jaki na jaho ŭžo nakidali.
Usie hetyja pytańni my budziem vyrašać paśla 11 kastryčnika. Ale zaraz usie našy maleńkija resursy treba skancentravać na tym, kab dziaŭbści narod dziela pieramienaŭ. Usio, što ja čuju ad ludziej, jakija nie ŭvachodziać u koła apazicyi, heta tolki stoma ad svarak i ŭzajemnych abvinavačvańniaŭ pamiž lidarami. Biełarusam užo ŭsio roŭna, chto tam ahient ci nie ahient ŭnutry apazicyi, jany chočuć, kab choć chtości štości zrabiŭ.
«Vy ŭvieś čas kažacie pra 11 kastryčnika, pry hetym ja ŭpeŭnieny, sami vydatna razumiejecie, što ničoha pryncypova nie źmienicca i nichto nie zmoža pieraškodzić Łukašenku pieramahčy na vybarach. Łukašenka stanie prezidentam, jak by ni prahałasavaŭ biełaruski narod, bo nichto nie zmoža prakantralavać vyniki hetaha hałasavańnia. I što źmienicca paśla 11 kastryčnika? Vy budziecie nieści ŭsiu paŭnatu maralnaj adkaznaści za lehitymizacyju dyktatury», — zapiarečyŭ Dźmitryjevu Pavieł Šaramiet.
«Ni ŭ adnym z kryteraŭ ABSIE niama punkta ab abaviazkovym udziele apazicyi ŭ vybarach. Vybary — heta palityčnaje rašeńnie palityčnych partyj. Dla Jeŭropy z punktu hledžańnia nie palityki, a zakona Ciareščanka, Hajdukievič i Ułachovič — dakładna takija ž apazicyjaniery, jak Labiedźka, Kalakin, Sańnikaŭ i Statkievič. Z farmalnaha punktu hledžańnia zakona jany ŭsie bałatujucca suprać Łukašenki.
Kali ABSIE budzie prytrymlivacca litary zakonu, to im budzie ŭsio roŭna — padstaŭnyja ci nie padstaŭnyja: podpisy sabrali, zarehistravalisia, praviali kampaniju, prajhrali.
Kali nie budzie ŭ śpisie Karatkievič, to ja ŭpeŭnieny, što padlik hałasoŭ budzie takim sumlennym, jakim nie byŭ nikoli ŭ Biełarusi za apošnija hadoŭ 15. I što my potym budzie kazać: «Oj, my pamylilisia»? U «Havary praŭdu» užo daŭno inšaja stratehija», — kaža Dźmitryjeŭ.
«U Biełarusi niama bajkotu. Jaho nielha arhanizavać, niemahčyma pravieści», — miarkuje jon.
«Druhaja vidavočnaja reč: lehitymizacyja ŭłady adbyvajecca dvuma šlachami i jany nie źviazanyja z vybarami. Pieršy šlach — heta hrošy Rasii. I druhoje — heta padziei va Ŭkrainie. Pazicyja Łukašenki pa Ukrainie lehitymizuje jaho dla Jeŭropy značna bolš, čym usie razam uziatyja apazicyjaniery. Bo Jeŭropa choča, kab Łukašenka zastavaŭsia ŭ pazicyi pamiž Rasijaj i Ukrainaj, a nie syšoŭ u bok Maskvy ŭ hetym pytańni.
I čym macniejšym budzie hołas Karatkievič, tym vyjaŭniej my zmožam pakazać Jeŭropie, što za Łukašenku staić nie 85% biełarusaŭ, a značna mienš. Čym bolš hałasoŭ nabiare Karatkievič, tym bolš u nas šancaŭ kazać Jeŭropie, što my chočam. Kali apazicyja praihnaruje ciapierašnija vybary, to ŭ jaje nie budzie mahčymaści niešta patrabavać ad Jeŭropy. Tady apazicyja zastaniecca ŭ takim ža razabranym stanie, u jakim jon jość i heta, sapraŭdy, stanie lehitymizacyjaj režymu», — kaža Dźmitryjeŭ.
«My nie viedajem, jaki scenar byŭ i jość va ŭłady, i nichto nie viedaje, jak jana vyrašyć pašychtavać hetuju šachmatnuju došku», — kaža Dźmitryjeŭ.
«My nie viedajem, kolki joj [Karatkievič] daduć [napišuć] hałasoŭ, ale značna važniej, kolki za jaje prahałasujuć», — kaža Dzmtryjeŭ.
«Va ŭmovach narastańnia kryzisu, kali kiraŭnik krainy ŭ hadzińniku za 15 tysiač jeŭra zaklikaje nas kuplać biełaruskaje, kali nam raspaviadajuć bajki, čym macniejšy u nas budzie alternatyŭny hołas, tym bolš šancaŭ na pośpiech našaha cisku», — uvažaje Dźmitryjeŭ.
«Va ŭmovach dyktatury, va ŭmovach aŭtakratyi pieramohaj prosta źjaŭlajecca vidavočnaje ŭzmacnieńnie alternatyŭnych siłaŭ. Ŭzmacnieńnie da takoj stupieni, što ich pačynajuć słuchać», — dumaje jon.
«Palityka — heta efiektyŭnaje rašeńnie zadač u zadadzienych mahčymaściach. U hetych umovach naša zadača — maksimalna ŭzmacnicca. Siońnia nichto nie moža skazać, u 2017 hodzie režym abryniecca ci nie, bo Rasija pačnie abvalvacca. Naša zadača — być maksimalna hatovym da lubych pieramienaŭ. Čym macniejšy naš hołas, tym bolš my hatovyja».
«Kali vy kažacie pra aŭtarytetnych, to ŭ Biełarusi niama aŭtarytetnych palitykaŭ, — miarkuje Dźmitryjeŭ. — Dla ludziej Karatkievič u biuleteni budzie značna aŭtarytetniejšaj, čym usie astatnija lidary, jakija ihnarujuć vybary i ŭ biuleteni nie znachodzicca. Heta aksijoma palityki», — ličyć jon.
«Karatkievič ciapier, padabajecca vam heta ci nie padabajecca, — aptymalny kandydat u hetaj situacyi. Jana nie pałochaje ludziej, jakija zakłapočanyja svaimi prablemami, ale pry hetym prosta bajacca za svajo žyćcio», — kaža Dźmitryjeŭ.
«Niaklajeŭ i Statkievič zaklikali ludziej vyjści na Płošču. Vy jak da hetaha staviciesia?» — zapytaŭsia Ŭ Dźmitryjeva Šaramiet.
«Skažu vam ščyra, u mianie asabista pakul niama razumieńnia, jak nam pravilna pravieści 11 kastryčnika, — adkazaŭ Dźmitryjeŭ. — Z adnaho boku, ludzi majuć prava na mirny pratest. Ź inšaha boku, hledziačy na toje, što adbyvajecca va Ukrainie i na nieadekvatnuju pazicyju ruskich, razumieju, što i ŭnutry biełaruskaj ułady jość hrupa całkam nieadekvatnych ludziej, jakija hatovyja na lubuju pravakacyju, ja nie viedaju, što rabić.
My b vyjšli jak mirnyja ludzi, a suprać nas zładzili b pravakacyju. I tady my ŭsie budziem nie ŭ dziarmie, jak vy nas pałochajecie, a ŭ kryvi. U dziarmie być nie strašna, možna iści dalej i dakazvać ludziam svaju racyju. A być u kryvi — heta zusim inšaje.
My budziem dumać nad 11 kastryčnika», — syšoŭ ad adkazu Dźmitryjeŭ.
