Na sumiesnych vučeńniach desantnych sił i śpiecnaza Rasii, Biełarusi i Sierbii, jakija pačnucca 2 vieraśnia na poŭdni Rasii, adpracujuć siłavoje padaŭleńnie masavych pratestaŭ. Pra heta zajaviŭ kamandujučy PDV RF Uładzimir Šamanaŭ.
«Meta vučeńniaŭ — padrychtoŭka i prymianieńnie sumiesnaj hrupoŭki ŭ śpiecyjalnaj apieracyi pa vyjaŭleńni i źniščeńni centra padrychtoŭki niezakonnych uzbrojenych farmiravańniaŭ», — paviedamiŭ Šamanaŭ.
Pavodle scenara vučeńniaŭ, «antyŭradavyja elemienty» i rehularnyja ŭzbrojenyja farmavańni supiernika sprabujuć šlacham pravakacyj i teraktaŭ maksimalna destabilizavać abstanoŭku va ŭmoŭnaj dziaržavie. Zychodziačy z hetaha, kamandavańnie abjadnanaj hrupoŭki pryniało rašeńnie na praviadzieńnie sumiesnaj antyterarystyčnaj apieracyi pa źniščeńni niezakonnych uzbrojenych farmiravańniaŭ i adnaŭleńni pravaparadku.
Pa słovach Šamanava, na pieršym etapie vučeńniaŭ budzie šyroka prymianiacca nieśmiarotnaja zbroja (jakaja mienavita, jon nie ŭdakładniŭ) — u chodzie «śpiecapieracyi pa praduchileńni biesparadkaŭ i nahniatańni abstanoŭki pa scenary Majdanu».
Vučeńni, jakija pravodziacca ŭ takim farmacie ŭpieršyniu, projduć z 2 pa 5 vieraśnia na palihonie Rajeŭski ŭ rajonie horada Novarasijska.
Z rasijskaha boku ŭ ich voźmie ŭdzieł ŭzmocnieny bataljon 7-j hvardziejskaj desantna-šturmavoj (hornaj) dyvizii, ad Sierbii — asobnaja desantnaja rota, ad Biełarusi — dźvie roty sił śpiecyjalnych apieracyj.
