Kampanija Google stała «dačkoj» novaj kampanii Alphabet, apošniuju ŭznačalili stvaralniki Google Łary Pejdž i Siarhiej Bryn. Čamu? Hetym pytańniem zadavalisia mnohija žurnalisty pa ŭsim śviecie, z čaho pažartavała Microsoft.
Aficyjny sajt Alphabet — abc.xyz, pieršyja i apošnija litary łacinskaha ałfavita. U chutkim časie źjaviŭsia i sajt z paradyjnym damienam — abc.wtf, apošniaja abrevijatura rasšyfroŭvajecca jak «što za ***?».
Ź litarami WTF u zahałoŭkach vychodzili šmatlikija naviny pra stvareńnie Alphabet.
Jak vyjaviłasia, IP-adras sajta prypisany raŭniutka da štab-kvatery Microsoft u Redmandzie (ZŠA). Nie dziva, što wtf-sajt viadzie na pošukavik Microsoft Bing. Tudy ž, darečy, viadzie i abc.fail (fail — anhł. «pravał»), čyj IP-adras naležyć da niamieckaj abščyny Bajern.
Sama Google taksama pažartavała, tolki bolš prystojna (kali heta, kaniešnie, prydumaŭ nie rasiejec). Ad pačatku na sajcie abc.xyz schavanaje «paschalnaje jajka»: kali nacisnuć na kropku paśla frazy «our drone delivery effort», braŭzier pierajdzie na sajt hooli.xyz, sajt vydumanaj kampanii «Hooli» ź sieryjała «Kremnievaja dalina» (my vam jaho raili).
Aficyjny sajt Alphabet, jak i niekatoryja servisy Google dy mnohija inšyja rečy, užo zabłakavany ŭ Kitai. A voś abc.wtf i abc.fail — nie.
