Kadr ź videahulni Mortal Kombat X
Aŭstralijski režysior Džejms Von stanie pradziusaram novaha filma ŭ suśviecie «Śmiarotnaj bitvy», što maje stać pierazapuskam sieryi, paviedamlaje tracing-board.com.
Jak kažuć na studyi New Line Cinema, režysior siami filmaŭ sieryi «Piła» i siomaha «Farsažu» maje advieści pierazapusk sieryi ad mifałohii i pryvieści da zmročnych, brutalna realistyčnych bajavych mastactvaŭ.
Scenar novaha filma, napisany Orenam Uzilem («Mača i botan-2», adzin z epizodaŭ veb-sieryjału «Mortal Kombat») i Dejvam Kałachemam («Niastrymnyja»), budzie naceleny na biaskryŭdnaha na pieršy pohlad chłopca, jaki asensuje svoj patencyjał i znojdzie siabie na poli boju miž Ziamloj i monstrami paralelnaha śvietu.
Praca nad filmam užo pačałasia. Režysior, akciorki skład, daty pačatku zdymak i premjery pakul nieviadomyja.
***
Mortal Kombat — sieryja videahulniaŭ-bojek, pieršaja hulnia jakoj vyjšła ŭ 1992 hodzie dla hulniovych aŭtamataŭ, paźniej była partavanaja na Super NES, Genesis, Game Gear, Game Boy dy inšyja kansoli. Stała viadomaja praz vysoki ŭzrovień hvałtu na ekranie dy realistyčnyja ruchi piersanažaŭ, pakadrava źniatyja z žyvych akcioraŭ.
Ahułam vyjšła dziesiać častak hulni. Apošniaja na siońnia, Mortal Kombat X, stała samaj pradavanaj hulnioj pieršaj pałovy 2015 hoda, niahledziačy na rejtynh 17+.
Pieršy film u śviecie hulniaŭ vyjšaŭ u 1995 hodzie, atrymaŭ strymanyja acenki krytykaŭ i hledačoŭ, ale sabraŭ u prakacie bolš za 122 młn dalaraŭ pry biudžecie ŭ 18 młn. Nastupny film, «Mortal Kombat: Anihilacyja» 1997 hoda mieŭ biudžet užo kala 30 młn dalaraŭ, sabraŭ 51 młn, ale byŭ abłajany krytykami za niejmavierna nizkuju jakaść. Taksama pa hulni byli źniatyja telesieryjał, veb-sieryjał i multsieryjał.
