Sustaršynia «Maładoha frontu» i były palitviazień Eduard Łobaŭ vajuje za Ukrainu. Heta stała viadoma paśla publikacyi jaho videazvarotu na kanale youtube u supołcy «Zhurtavańnie patryjotaŭ».
«Dumka pryjechać va Ukrainu ŭ mianie źjaviłasia jašče padčas znachodžańnia ŭ kałonii, ale mahčymaści pryjechać nie było. Mahčymaść źjaviłasia tolki paśla vyzvaleńnia», — havoryć Eduard Łobaŭ u zvarocie.
Jaho paplečnik, sustaršynia «Maładoha frontu» Źmicier Daškievič kaža, što arhanizacyja ź vialikaj pavahaj i honaram pastaviłasia da rašeńnia Eduarda Łobava, jakoje było vyklučna asabistym: «Usie ludzi, jakija vajujuć za niezaležnaść Ukrainy i suprać ahresii ardy, — heta hieroi. I naturalna, što Eduard Łobaŭ, jaki vyrašyŭ dałučycca da zmaharoŭ, — heta hieroj».
Źmicier Daškievič adznačyŭ, što praz techničnyja pryčyny mahčymaści kamunikavać z paplečnikam nie maje, ale padtrymlivaje jaho ŭ malitvach. «Viadoma, tam niebiaśpiečna, my, siabry i paplečniki Eduarda, chvalujemsia za jaho. Molimsia za Ukrainu, za ŭkrainskuju armiju, za ŭsich ludziej, jakija vajujuć, u tym liku i za našaha siabra Eduarda Łobava», — skazaŭ Źmicier Daškievič.
***
Eduard Łobaŭ naradziŭsia ŭ 1988 hodzie. Da dziejnaści «Maładoha frontu» dałučyŭsia paśla viartańnia z vojska. Słužbu prachodziŭ u 103-j asobnaj hvardziejskaj mabilnaj bryhadzie ŭ Viciebsku. U 2011 hodzie byŭ asudžany na 4 hady pazbaŭleńnia voli pavodle artykułu «chulihanstva» razam ź lidaram «Maładoha frontu» Źmitrom Daškievičam. Vyjšaŭ na volu 18 śniežnia 2014 h.
