U lipieni hetaha hoda Biełaruś raźličvaje atrymać novy kredyt ad Rasii.
Ab hetym paviedamiŭ ministr finansaŭ Uładzimir Amaryn, hutaračy 26 červienia z žurnalistami ŭ pałacie pradstaŭnikoŭ.
Pavodle jaho słoŭ, novy kredyt budzie nakiravany na refinansavańnie płaciažoŭ pa absłuhoŭvańni raniej atrymanych ad Rasii kredytaŭ. «Spadziajusia, kredyt pryjdzie ŭ lipieni, — skazaŭ Amaryn. — U hetym miesiacy budzie apošniaja stadyja pieramoŭ. Razmova idzie ab refinansavańni raniejšych kredytaŭ Rasii».
Amaryn adznačyŭ, što suma kredytu «budzie nie 760 młn. dalaraŭ, jak kazaŭ rasijski pasoł, budzie inšaja suma». «Jana stanie viadomaja tady, kali pryjdzie kredyt», — udakładniŭ jon.
Amaryn taksama nahadaŭ, što ŭ krasaviku Rasija vydzieliła Biełarusi kredyt u 110 młn. dalaraŭ na refinansavańnie płaciažoŭ na karyść RF.
Na pytańnie žurnalistaŭ, ci nie suprać Rasija refinansavać biełaruskija płaciažy, Amaryn adznačyŭ: «Nie, pryncypova nie suprać».
