Džazavyja viečary ŭ samym centry stalicy — dobry pačatak fiestyvalnaha leta
Minułyja vychodnyja musili pierakanać minčukoŭ nie siadzieć doma hetym letam: u subotu pad ratušaj raspačalisia džazavyja viečary, u niadzielu prajšli masavyja bai farbami. Što rabić dalej? «Naša Niva» sabrała šerah cikavych letnich festaŭ u Biełarusi.
Kali źbirajeciesia pravieści letni adpačynak za miažoj, pahladzicie na 30 muzyčnych festaŭ blizkaha i dalokaha zamiežža.
«Muzyčnyja viečary ŭ Mirskim zamku», 12-14 červienia
Mirski zamak sioleta prymie niezvyčajnych haściej: razam z zorkami biełaruskaj estrady vystupiać rasijskija śpievaki Michaił Šufucinski (užo nie: zamiest jaho biełarusy Neuro Dubel i Akute) i Łalita, a bard-śpiavačka Palina Respublika śpiaje na adnoj scenie z doktaram Sajkovym.
«Džazavyja suboty la Ratušy», 13 i 20 červienia, Minsk
Minčukoŭ čakajuć jašče dva džazavych viečary na płoščy Svabody. U bližejšuju subotu vystupiać vystupiać Bieata Pšybytek, Nhujen Le i jaho trya «Ahoń i vada», Kłaus Štoter Morfé. Praz tydzień — Denis Baptyst i Apple Tea.
Kupalskaje Koła-2013, fota: Stas Šlachcič, Ultra-music.com
«Kupalskaje Koła», 20-21 červienia, Dudutki
Kupalle ŭ Dudutkach abiacaje być hučnym: na ŭžo siomym «Kupalskim kole» poruč sa «Starym Olsam» i «Pałacam» vystupiać Gods Tower, Dzieciuki, Omut, Rise in Rage, słavutyja Vader i mnohija inšyja. Akramia kancertaŭ płanujecca kirmaš majstroŭ, staražytnyja hulni i abrady dy kupalskija vohniščy.
«Soncazvarot na Sialavie», 26-28 červienia, kempinh Sialava
Pad Krupkami (na ŭsialaki vypadak: 54.54120°N, 29.18071°E) projdzie sapraŭdny kempinh-fest z etna-dyskatekaj, śpievami pad vohnišča, horadam majstroŭ, ekskursijaj na tajamničy vostraŭ dy majstar-kłasami pa tancach i placieńni viankoŭ.
GreenFest, 3 lipienia, aeradrom Baravaja
Na Dzień niezaležnaści pad Minskam vystupiać słavutyja rokiery Papa Roach z novym albomam «F.E.A.R» pry padtrymcy rasiejcaŭ Lumen i «Kipiełov», a taksama biełarusaŭ «Daj darohu», Main-de-Gloire i inšych.
«Recha-2013». Fota: s13.ru
«Recha», 3 lipienia, pad Hrodna
Na terytoryju adpačynku «Vieles» pad Hrodna pryviazuć muzyku, jakuju praściej za ŭsio apisać słovam «niezvyčajnaja»: minčuki Siarhiej Pukst, Pafnutiy's Dreams, Mustelide, Slowner, maskvičy Holy Palms i JIO Kotiata, piciercy Lemondej i inšyja. Akramia taho, na feście budzie kutok chendmejdu, open-air-łaźnia, raznastajnyja majstar-kłasy i načnyja kinapakazy.
«Honaru prodkaŭ», 4-5 lipienia, Vilejka
Da 555-hodździa Vilejki ŭ «Nižnim parku» projdzie vializny muzyčna-rycarski fest z udziełam Znich, Rokash, Miareža, «Horyń» i mnohich inšych, siaredniaviečnymi tancami, rycarskimi bajami i sapraŭdnym šturmam zamka, vandroŭnym teatram, batlejkaj i fajer-šoŭ.
«Žyvoje nieba Brasłava», 11-12 lipienia, Brasłaŭ
Na Zamkavaj hary Brasłava spałučycca amal niespałučalnaje: ramantyčnaja Pauline, techaski bluz Cross B Band, mietalisty Ivory, panki Fake Lab, folk-rokiery By Cry i mnohija inšyja.
«Kosmas naš», 17 lipienia, Minskaje mora
Na vostravie Kachańnia projdzie ŭžo 11-y fiestyval kłubnaj muzyki «Kosmas naš». Siarod chedłajnieraŭ adzin z samych papularnych dydžejaŭ śvietu James Zabiela, dobra znajomy biełarusam niemiec Westbam, London Elektricity and MC LowQui, a taksama paśpiachovy biełaruski dydžej Koń dy mnohija inšyja.
«Basovišča-2014». Fota: Jerzy Doroszkiewicz, poranny.pl
Basowiszcza, 17-18 lipienia, Haradok, Polšča
Adzin z najstarejšych biełaruskich festaŭ i samy biełaruski z zamiežnych fiestyvalaŭ, «Basovišča» znoŭ stanie konkursam. Pieramožcami adboračnaha konkursu stali Naka, By Cry, Exegutor i TonqiXod, a chedłajnieram stanie Brutto.
«Koła času», 25 lipienia, Ždanovičy
Na trecim fiestyvali retra-matacykłaŭ pad vioskaj Ždanovičy źbiaruć žaleznych koniej nie maładziej za 30 hod, zapuściać «matacykł na drovach», praviaduć retra-rali, a taksama abiaruć najlepšyja matacykły ŭ niekalkich naminacyjach.
«Viva Brasłaŭ», 25 lipienia, Brasłaŭ
Na centralnym plažy horada vystupiać ukraincy «Bumboks», hałandziec Mark Siksma, rasijski elektronščyk Alaksandr Papoŭ i inšyja, taksama ŭ prahramie fajer-šoŭ, fiejervierk dy akvapark.
«Naš Hrunvald-2014». Fota: tio.by
«Naš Hrunvald», 25-26 lipienia, Dudutki
Maštabny rycarski fest z rekanstrukcyjaj Hrunvaldskaj bitvy, turnirami ručnikaŭ, alebardystaŭ i vieršnikaŭ, ramiesnymi majsterniami i majstar-kłasami, tancami dapoŭniać vystupy rok- i fołk-hurtoŭ ź Biełarusi, Ukrainy, Litvy i Polščy.
Mirum Music Festival, 8 žniŭnia, Mir
Sioleta ŭ Mirski zamak vierniecca lubimaja biełarusami hruzinskaja džaz-śpiavačka Nino Katamadze, razam ź joj vystupić ukrainski elektra-folk hurt «Onuka». Nieŭzabavie abiacajuć nazvać i treciaha chedłajniera.
Metal Crowd, 15-16 žniŭnia, Rečyca
Na 11-m fiestyvali ekstremalnaj muzyki ŭ Rečycy ciaham dvuch dzion vystupiać niamieckija det-folk-mietalisty Die Apokalyptischen Reiter, biełaruskija panki Trubetskoy i «Daj darohu» i mnohija inšyja ciažkija hurty ź Biełarusi i blizkaha dy dalokaha zamiežža.
P.S. Kavałačak leta jašče možna budzie złavić 5 vieraśnia na tradycyjnym folk-feście «Kamianica».
***
Kali źbirajeciesia na dobry fest, nie paznačany vyšej, napišycie pra jaho ŭ kamientarach!
