Fota: android-developers.blogspot.com
Karparacyja Google praviała štohadovuju kanfierencyju Google I/O, na jakoj pradstaviła novuju viersiju samaj papularnaj mabilnaj apieracyjnaj sistemy Android.
Android M — jašče nie kančatkovaja nazva. Kali apieracyjonka vyjdzie dla karystalnikaŭ u trecim kvartale 2015 hoda, jaje nazvu dapoŭniać jakim-niebudź «sałodkim» słovam, jak toje było z Android L/Lollypop.
Android M užo možna zahruzić u papiaredniaj viersii na smartfony i płanšety Nexus 5, 6 i 9. Kali novaja viersija źjavicca na inšych aparatach — zaležyć ad ich vytvorcaŭ.
Jak śćviardžajuć u Google, novaja viersija Android maje bolš za 10 źmien i palapšeńniaŭ. Najbolš na prezientacyi źviartali ŭvahu na nastupnaje:
Možna budzie samomu abrać, što dazvalać prahramam
Kab pracavać na smartfonie, prahramie nadajuć dazvoły: Instagram musić mieć dostup da kamiery, navihatar — da GPS. Ale časam jaki-niebudź biaskryŭdny kalandaryk choča atrymać dostup da vašych kantaktaŭ i mahčymaści vysyłać płatnyja SMS.
U novym Android ab žadańni prahramy niečym skarystacca vy daviedajeciesia nie ŭ pracesie ŭstaloŭki, a tady, kali prahrama zachoča skarystacca kankretnaj funkcyjaj. Viber choča dostup da internetu — dobra, jamu treba. Kalkulatar choča patelefanavać — nie, nie dazvalajem. Mianiać užo pryniatyja vyrašeńni možna budzie ŭ naładach.
Nie treba budzie abirać, praź jakuju prahramu adkryjecca spasyłka
Kali vy budziecie, naprykład, z Facebook adkryvać spasyłku na sajt ŭ novym Android, jana nie prosta adkryjecca ŭ braŭziery pavierch Facebook. Spasyłka adkryjecca ŭ novym vaknie nakštałt braŭziera ŭ samoj prahramie, braŭzier nie budzie zapuskacca asobna.
Novy Android taksama nie stanie pytać, ci adkryvać spasyłku na tvit, što vy atrymali pa pošcie, praz braŭzier ci klijent Twitter. Apieracyjnaja sistema sama vyznačyć, ci jość na aparacie prahramy, što najlepiej adkryvajuć spasyłki takoha typu.
Płaciažy i adbitki palcaŭ uparadkujucca
Padtrymka skanieraŭ adbitkaŭ palcaŭ na roznych aparatach budzie standartyzavanaja. Ciapier raspracoŭščykam budzie praściej pisać zaviazanyja na adbitki palcaŭ prahramy adnačasova dla Samsung, HTC, Huawei i lubych inšych telefonaŭ. Adbitkam palca možna budzie nie tolki razbłakavać telefon, ale i paćvierdzić płaciož.
Sami płaciažy taksama buduć uparadkavanyja: jak i Apple, Google zaviadzie svaju płaciožnuju sistemu Google Pay. Apłatu praz NFC užo padtrymlivajuć amierykanskija mabilnyja apieratary, Visa, Mastercard, American Express, Discover, a taksama 700 tysiač kram u ZŠA.
Telefon stanie ekanomić batareju jašče trošački lepš
Kali uklučany telefon prosta lažyć na stale, u jaho «mozhu» praciahvaje adbyvacca burnaja dziejnaść — «UKantakcie», Facebook, Twitter, Instagram, Skype, Viber i ŭvieś astatni «zaapark», što vy ŭstalavali, pa čarzie praviaraje najaŭnaść abnaŭleńniaŭ. I tracić na heta zarad akumulatara.
Novaja funkcyja pad nazvaj Doze uparadkuje pošuk abnaŭleńniaŭ pry «lažačym» režymie. Kali vy nie karystajeciesia telefonam, jon budzie praviarać tolki samaje važnaje i radziej «pračynacca», što zmoža zekanomić da pałovy zaradu pry nieaktyŭnym vykarystańni.
Bieźlimitnaje schovišča ahromnistych fota i videa
Heta nie zusim źmiena ŭ apieracyjoncy: heta prahrama, dastupnaja ŭžo siońnia. Google Photos dazvalaje zahružać fota razroźnieńniem da 16 Mp i videa da 1080p u asobnaje vobłačnaje schovišča. Abmiežavańniaŭ pa kolkaści niama. Zdymki možna sartavać pa časie, miescy i ludziach na ich. Raniej prahrama była častkaj sacsietki Google+.
Prahrama zachavała mahčymaść aŭtamatyčnaj i ručnoj apracoŭki fota. To značyć, vy možacie zahruzić fota ŭ schovišča i prahrama sama zrobić ich maksimalna pryhožymi. A možacie samastojna apracavać zdymak u davoli funkcyjanalnym redaktary (bolš «navaročanym» za Instagram).
Drobnyja źmieny
U novym Android budzie realizavanaja padtrymka USB Type C — takoha porta dla zaradki i pieradačy infarmacyi, u jaki kabiel možna ŭstaŭlać lubym bokam. Padobnym čynam realizavany port u novych iPhone. Da taho ž, vy zmožacie padklučyć smartfon da płanšeta i abrać, chto kaho stanie padzaradžać.
Asistent Google Now stanie jašče razumniejšym. Jon stanie razumieć vas u starońniaj prahramie. Kali vy ŭ Spotify prahladajecie staronku vykanaŭcy, možna budzie skazać «OK, Google, jak jaho sapraŭdnaje imia?». A kali vas pa pošcie zaprosiać u kaviarniu, Google padrychtuje kartku hetaj kaviarni ź infarmacyjaj pra jaje, mapaj, a to i mieniu.
Braŭzier Google Chrome abiacajuć zrabić chutčejšym. Pry drennym złučeńni jon padbiare, nakolki jakasnymi zahružać karcinki — kali sihnał słaby, staronki buduć hruzicca ścisnutymi (kažuć, až da 80% mienš trafiku).
Karty Google Maps navučacca padtrymlivać hałasavuju navihacyju navat pry adsutnaści internetu. A Youtube zmoža bieź internetu pakazvać papiarednie zapampavanyja videa.
Šerah drobnych abnaŭleńniaŭ atrymała i viersija Android dla nasimaj elektroniki Android Wear. U dadatak da jaje źjaviłasia asobnaja prahrama dla «razumnaha ŭsiaho» Project Brillo — prahramistam budzie praściej źviazać u adnu sistemu smartfon, płanšet, razumny hadzińnik, razumnuju lampačku, mašynu, choć razumny tostar.
