Chiendryk Maryjus Jonkiers. Fota Jeŭrapiejskaha patentnaha ofisa.
Ramont raskolinaŭ u bietonnych pabudovach abychodzicca Jeŭrapiejskamu sajuzu ŭ 6 miljardaŭ jeŭra ŭ hod. Hałandski mikrabijołah z Dełfckaha ŭniviersiteta Chiendryk Maryus Jonkiers prydumaŭ, jak vyrašyć hetu prablemu biez dadatkovych vydatkaŭ.
Jonkiers raspracavaŭ asablivy typ bietonu, jaki moža samastojna «zalečvać» raskoliny.
Sakret bietonu zaklučajecca ŭ admysłovaj prysadcy sa sporaŭ bakteryj Bacillus pseudofirmus ci Sporosarcina pasteurii i łaktatu kalcyju. Spory dadzienych vidaŭ bakteryj dobra pieranosiać haračyniu i choład i mohuć zastavacca žyćciazdolnymi ciaham stahodździaŭ.
Kali ŭ bietonie ŭtvarajecca raskolina, u jaje pačynaje pastupać vilhać. Tady bakteryja abudžajecca i pačynaje charčavacca łaktatam kalcyju. U pracesie žyćciadziejnaści bakteryi vyrablajuć vapniak, jaki cemientuje raskoliny i nie daje im razrastacca.
Raskolina ŭ bietonie.
Raskolina, zacemientavanaja bakteryjami.
Jonkiers kaža, što bakteryi ŭ bietonie mohuć zacemientavać raskoliny šyrynioju da 0,8 milimietra. Dla demanstracyi mahčymaściaŭ svajho vynachodnictva Jonkiers pabudavaŭ dom z 6-santymietrovymi ścienami z raspracavanaha im arhaničnaha bietonu. Mikrabijołah kaža, što budynak paśpiachova «lečyć» raskoliny.
Vytvorčaść novaha bietonu płanujecca zapuścić u 2016 hodzie. Adnak jašče raniej možna čakać inšuju raspracoŭku Jonkiersa — vadkaść dla cemientavańnia raskolinaŭ, jakuju možna nanosić na zvyčajny bieton.