Słužba biaśpieki Ukrainy vyklučyła abmien dvuch zatrymanych u Łuhanskaj vobłaści rasijskich vajskoŭcaŭ na pałonnych ukrainskich sałdat.
Jak zajaviŭ na bryfinhu kiraŭnik SBU Valancin Nalivajčanka, zatrymanych čakaje kryminalnaja adkaznaść, ciapier ź imi pracujuć śledčyja.
«Jany pavinny adkazać pa artykule 258 Kryminalnaha kodeksu — terarystyčnaja dziejnaść i terarystyčnyja złačynstvy», — skazaŭ kiraŭnik słužby.
Raniej ukrainskija ŭłady paviedamili pra zatrymańnie ŭ Łuhanskaj vobłaści na kantralavanaj imi terytoryi dvuch rasijskich vajskoŭcaŭ-śpiecnazaŭcaŭ z Hałoŭnaha raźviedvalnaha ŭpraŭleńnia hienštaba ŭzbrojenych sił Rasii.
Rasija kateharyčna admaŭlaje prysutnaść svaich vajskoŭcaŭ u zonie kanfliktu na ŭschodzie Ukrainy, ale pryznaje, što tam mohuć znachodzicca dobraachvotniki z Rasii, jakija prybyli pa svajoj inicyjatyvie.
U dadzieny momant zatrymanyja, jakija atrymali ranieńni ŭ chodzie boju, pieraviedzienyja ŭ Kijeŭ i znachodziacca na lačeńni ŭ Hałoŭnym vajennym kliničnym špitali, zajaviŭ na pres-kanfierencyi načalnik hienštaba Ukrainy hienierał Viktar Muženka.
Pavodle jaho słoŭ, jość nieabvieržnyja fota- i videadokazy taho, što heta vajskoŭcy rasijskaj armii, jakija znachodziacca na słužbie. Hetyja dokazy paabiacali apublikavać «paśla peŭnaj apracoŭki».
