Padatkovyja orhany buduć vykarystoŭvać źviestki ab kredytach biełarusaŭ dla vyjaŭleńnia tych hramadzian, jakija žyvuć nie pa srodkach. Pra heta paviedamiła namieśnik načalnika hałoŭnaha ŭpraŭleńnia padatkaabkładańnia fizičnych asob Ministerstva pa padatkach i zborach Biełarusi Śviatłana Šaŭčenka.
Źviestki z kredytnych historyj buduć vykarystoŭvacca ŭ metach vyjaŭleńnia hramadzian, jakija nie atrymlivajuć aficyjnych dachodaŭ, ale nabyvajuć u kredyt darahuju majomaść, kvatery, žyłyja damy, ziamielnyja ŭčastki, transpartnyja srodki.
«Jany atrymlivajuć taki kredyt, pahašajuć jaho. Uźnikaje pytańnie — za košt jakich krynic? Čałaviek nikoli nidzie nie pracavaŭ i lehalnych krynic dla isnavańnia nie maje», — skazała Śviatłana Šaŭčenka.
Padatkovyja orhany i raniej mieli źviestki ab dachodach i majomaści hramadzian, mahli paraŭnać ich dachody i raschody z dapamohaj aŭtamatyzavanaj sistemy. Na padstavie hetych danych pravodziacca kantrolnyja mierapryjemstvy. Źviestki, jakija budzie pradastaŭlać rabotnikam padatkovych orhanaŭ Nacyjanalny bank, stanuć dapaŭnieńniem da hetaj infarmacyi.
«Jość hramadzianie, jakija atrymlivajuć zarpłatu abo inšyja dachody ŭ niaznačnym pamiery, tym nie mienš jany nabyvajuć darahuju majomaść z dapamohaj kredytaŭ i za košt niejkich krynic ich pahašajuć. Adpaviedna ŭ adnosinach da hetych asob buduć pravodzicca kantrolnyja mierapryjemstvy», — adznačyła pradstaŭnik MPZ.
Uvahu padatkovych orhanaŭ pryciahnuć taksama hramadzianie, jakija biaruć kredyt, karystajucca im niekalki dzion i adrazu viartajuć. U Biełarusi byli sproby lehalizavać takim čynam šeryja dachody.
Pavodle słoŭ Śviatłany Šaŭčenka, novaŭviadzieńni nakiravany na toje, kab bolš efiektyŭna vyjaŭlać niezarehistravanych pradprymalnikaŭ, tych, chto ŭchilajecca ad vypłaty padatkaŭ. Dobrasumlennym padatkapłacielščykam chvalavacca niama čaho, padkreśliła jana.
«Jość zakon ab dekłaravańni fizičnymi asobami dachodaŭ i majomaści. U im prapisana, jakaja majomaść padlahaje abaviazkovamu dekłaravańniu, jakija dachody. Kali hramadzianin atrymlivaje lehalna zarpłatu, pracuje pa hramadzianska-pravavych dahavorach, mahčyma, mieŭ dachody z-za miažy ŭ vyhladzie dyvidendaŭ i jość paćviardžalnyja dakumienty, to niama nieabchodnaści chvalavacca. Jon paćvierdzić lehalnyja krynicy i rastłumačyć, za košt jakich srodkaŭ nabyvałasia majomaść», — rastłumačyła pradstaŭnik MPZ.
