Rafał Juščak staŭ viadomym u prafiesijnych kołach pracaj na kiraŭničych pasadach u bankach Polščy i Ukrainy. U adkrytym i ščyrym intervju «Ježiednievniku» jon raskryŭ, jakija ambicyi maje namier realizavać u Biełarusi i čym jaho pryvabiŭ na pracu «Alfa-Bank».
Na pasadu dyrektara «Alfa-Banka» ŭ Biełarusi Rafał Juščak pahadziŭsia jašče na pasadzie top-mieniedžara polskaha finansavaha chołdynhu. Rašeńnie na karyść takoha nieraŭnaznačnaha varyjantu vyhladaje davoli niečakanym.
Rafał Juščak zhodny, što jano niečakanaje: «Heta ŭžo nie pieršy raz, kali ja dziejničaju suprać trendu». Jon pačynaŭ svaju karjeru ŭ francuzskim banku ŭ 1996 hodzie i vyklikaŭ ździŭleńnie kalehaŭ, kali ŭ 2008 hodzie vyrašyŭ syści ŭ polski bank. Praź niekalki hadoŭ spadar Juščak jašče raz ździviŭ kamjunici, zajaviŭšy ab sychodzie z Sitibank — najbujniejšaha roźničnaha banka ŭ krainie. «Ja lublu pieramieny», — pryznaŭsia mieniedžar.
Ab vialikich mahčymaściach u nievialikaj Biełarusi
Dziŭny vybar ambicyjnaha bankira na karyść ścipłaj Biełarusi jon sam patłumačyŭ tym, što tut možna chutka dasiahnuć pośpiechu.
Pa-pieršaje, na jaho dumku, u Biełarusi niama surjoznaj kankurencyi pamiž bankami. Kraina niemaleńkaja, ale pry hetym adzin z bujnych polskich bankaŭ pa vieličyni aktyvaŭ pieravyšaje ŭvieś bankaŭski siektar Biełarusi.
Pa-druhoje, biełaruski «Alfa-Bank» — nievialikaja kampanija. «U takim maleńkim banku ja nikoli ŭ žyćci nie pracavaŭ, — skazaŭ Rafał Juščak. — I heta cikava, bo ŭ mianie niama kompleksu «ŭ kaho bolšy». U maleńkim banku za adzin kvartał paśpieješ paznajomicca z usimi, možna ŭpłyvać na karparatyŭnuju kulturu, pakazać kaleham, jak raźvivać biznes pa-inšamu».
Ź inšaha boku, bank choć i maleńki, ale jość adčuvańnie vialikaj hrupy (bank uvachodzić u rasijskuju «Alfa-Hrup»).
«Atrymlivajecca, što b ty ni zrabiŭ u Biełarusi, pra heta daviedajucca va ŭsioj krainie, tamu što tut mała bankaŭ, i daviedajucca va ŭsioj hrupie, tamu što spravy ŭ asobnych bankaŭ hrupy iduć niaprosta. Tut tvoj pośpiech budzie vyhladać u try razy bolšym, čym zvyčajna», — paŭžartam raspavioŭ pra svaje surjoznyja ambicyi dyrektar.
Navat toje, što hrupa naležyć rasiejcam, u vačach Rafała Juščaka dadaje hetaj pracy razynačku: «Heta cikava — palak pracuje na rasiejcaŭ u Biełarusi». Pavodle jaho słoŭ, u «Alfa-Banka» jość dobraje razumieńnie Jeŭropy, mieniedžar navat nazvaŭ jaho «rasijskim zachodnim bankam».
Dla Rafała Juščaka taksama važna, što bank nie źjaŭlajecca dziaržaŭnym: «Nastolki advažnym ja b nie byŭ, kab pajści ŭ dziaržbank».
Ab płanach u «Alfa-Banku»
Viadomy mieniedžar, jak praviła, pracuje z bankami na praciahu troch hadoŭ. Jaho płany pa Biełarusi pakul taksama na try hady. Zaraz jon pracuje nad stvareńniem novaj stratehii dla «Alfa-Banka» — raskryć jaje jon pavinien praz try miesiacy.
«Ja nie pryjšoŭ tut usio pamianiać, — skazaŭ Rafał Juščak. — Maja zadača — vybrać pryjarytety z taho, što jość, i dadać niešta novaje. Ciapierašniaje dziasiataje miesca «Alfa-Banka» nikomu nie padabajecca, niahledziačy na dobryja pazicyi brenda na rynku. Ja chaču bolš. Ja nie chaču zrabić jaho bankam numar adzin u krainie, ja nie varjat, z «Biełarusbankam» spaborničać nie źbirajusia. Ale ja chaču być numar adzin, naprykład, pa elektronnych pasłuhach».
Kiraŭnik firmy stavić pierad saboj zadaču zrabić «Alfa-Bank» bankam «pieršaha vybaru» — zrazumiełym, sučasnym i kamfortnym, «kab usio možna było zrabić praz telefon, a nie ŭ adździaleńni banka». Jaho bank pavinien adroźnivacca ad inšych. Dla hetaha kampanii treba zaniać nišu, jakaja jašče volnaja na rynku.
Ab svabodnych nišach na rynku
Rafał Juščak upeŭnieny, što inavacyjnaja niša ŭ biełaruskim bankaŭskim siektary jašče volnaja. Jaho rodnaja Polšča jakraz atrymała pośpiech u hetym płanie — acenačna, jana ŭvachodzić u pieršuju dziasiatku krain śvietu pa inavacyjach u bankaŭskaj śfiery. «Kali ŭ Polščy ja chaču adkryć rachunak, ja znajdu dziesiać raŭnacennych prapanoŭ. U Biełarusi ja znajdu tolki zarpłatny rachunak», — skazaŭ bankir.
«Biełaruś — heta takaja kraina ŭ Jeŭropie, dzie vielmi blizka da Varšavy, da Łondana, da Maskvy. Amal u centry. Zdavałasia b, dostup da infarmacyi jość. Ale dostup da infarmacyi pakul nie transfarmujecca ŭ realnyja źmieny, — adznačyŭ mieniedžar. — I tym nie mienš ja vieru ŭ Biełaruś. U Biełarusi internetam karystajecca kala 6 młn čałaviek, kuplajuć u internecie 2—3 miljony, heta ŭžo dobra. I heta tolki pačatak».
Śpiecyjalist zaraz naziraje za raźvićciom tranzakcyjnaha elektronnaha biznesu. Jon upeŭnieny, što chutka ŭsie buduć kuplać valutu praź internet. «Tamu što heta lohka — praściej paraŭnać ceny».
Ab pryciahnieńni polskaha biznesu ŭ Biełaruś
Kali Rafał Juščak paznajomiŭsia ź Biełaruśsiu, jaho źbiantežała pytańnie, čamu tut tak mała zamiežnych bankaŭ. Bo kraina nie maleńkaja, patencyjał jość. Ale z zachodnich bankaŭ tut tolki polskija i adzin z aŭstryjskich bankaŭ.
«Dumaju, sprava ŭ tym, što niama razumieńnia krainy, taho, jak tut pracuje biźnies, — miarkuje bankir. — Ale heta možna źmianić. Bo dvaccać hadoŭ tamu hetak ža nichto nie razumieŭ Polšču».
Ekśpiert ličyć Biełaruś pierśpiektyŭnaj krainaj dla pryciahnieńnia inviestycyj.
«Z polskich kampanij da mianie vielmi šmat pytańniaŭ prychodzić pra Biełaruś — ci možna tut pracavać. Ja pierakonvaju polskich kalehaŭ, što Biełaruś moža być dobraj krainaj dla pabudovy biznesu, asabliva ŭličvajučy toje, što adbyvajecca va Ukrainie».
Takuju cikavaść jon razhladaje jak mahčymaści dla markietynhu — «Alfa-Bank» moh by akazvać pasłuhi polskim kampanijam: «Tady ŭvieś polski biznes u Biełarusi budzie absłuhoŭvacca ŭ nas», — skazaŭ dyrektar.
Čym moža być cikavaja zamiežnikam Biełaruś? Naprykład, u Jeŭropie depazit na hod dajecca pad 1% tłumačyć ekśpiert. Kali ŭ Biełarusi jon pad 7%, to dla jeŭrapiejca heta ŭžo vyhladaje pryvabnym. «Adzin z polskich bankaŭ pracavaŭ tak u Hiermanii — my płacili pa ŭkładach nie 1%, a 3%», — dzielicca idejami Rafał Juščak.
Dyviersifikacyja resursaŭ — heta zadača luboha banka. Siońnia «Alfa-Bank» nie patrabuje ad novaha dyrektara pryciahnuć zachodni kapitał — bank likvidny, dla jaho hetaje pytańnie staić nie vostra. «Ale kali buduć takija mahčymaści, to čamu nie», — razvažaje ekśpiert.
Ab devalvacyi i Nacbanku
Piarečańni ab składanaści pracy ŭ biełaruskich realijach Rafał Juščak admioŭ.
Paraŭnoŭvajučy našu krainu z Ukrainaj, jon adznačyŭ u Biełarusi adčuvalny ŭzrovień biurakratyi. «Ale jana transparentnaja. Tut ja mahu zapoŭnić na dva dakumienty bolš, ale ja razumieju ŭmovy, jany prazrystyja. Kali ja pracavaŭ va Ukrainie, pamiataju, nichto ničoha nie razumieŭ. Chiba što kolki płacić hrošaj i kamu. I navat heta nie ŭsie razumieli».
Istotnaj pahrozaj na biełaruskim rynku źjaŭlajecca makraekanamičnaja niestabilnaść i devalvacyja. «Ja nie chaču śmiajacca i kazać, što nam usio roŭna, — skazaŭ mieniedžer. — Heta surjoznaja prablema i dla źbieražeńniaŭ, i dla kredytaŭ. Ale ja nie chacieŭ by apraŭdvać hetym svaju nieefiektyŭnuju pracu. Bo takija ŭmovy dla ŭsich udzielnikaŭ rynku».
Abmiežavańni i pastajannyja ŭmiašańni Nacbanka śpiecyjalista taksama nie pałochajuć. «Nacbank ŭ Biełarusi pracuje vielmi aktyŭna i kantraluje situacyju, i heta dobra. Naprykład, pazbaŭleńnie licenzii troch bankaŭ — pravilny krok. Heta lepš, čym dapuścić bankructva hetych bankaŭ. Dziejničać na apiaredžańnie zaŭsiody biaśpiečniej. Viadoma, tut važna, što heta tolki try banki», — adznačyŭ bankir.
Pa jaho słovach, u zachodnich krainach paśla padziej 2008 Centrabanki taksama pačali kantralavać rynak u ručnym režymie. «Takoj mocnaj pazicyi bankaŭskaha nahladu ŭ śviecie jašče nie było. I heta narmalna, bo bankaŭski siektar — heta nie rynak bulby i tamataŭ, heta surjoznaja śfiera, jakaja ŭpłyvaje na ekanomiku krainy. I Centrabank — heta orhan, jaki nie prosta rehuluje banki, jon adkazvaje za manietarnuju stabilnaść».
Rafał Juščak śćviardžaje, što ŭ Jeŭropie taksama paralelna z zakonami isnujuć «rekamiendacyi» Centrabanka, jakija «pasprabavaŭ by chto-niebudź nie vykanać».
Infarmacyja pa spravie
Rafał Juščak pracavaŭ na pasadzie namieśnika staršyni praŭleńnia chołdynhu Getin Holding (polskaha aliharcha Lešeka Čarnieckaha), a taksama na kiraŭničych pasadach u polskim banku PKO Bank Polski, «Pieršym mižnarodnym ukrainskim banku» (naležyć ukrainskamu miljarderu Rynatu Achmietavu), u «Rumynskim mižnarodnym banku», «Ideja-Banku» va Ukrainie, Biełarusi i Rasii, ataksama ŭ «Biełaruskim banku małoha biznesu».
Naradziŭsia 7 vieraśnia 1969 hoda. Skončyŭ u 1994 Univiersitet Hdańska (Polšča), atrymaŭšy stupień mahistra histaryčnych navuk, i ŭ 1996 — Vyšejšuju škołu mieniedžmientu (biznes-škoła) horada Ruan (Francyja) sa stupieńniu mahistra bankaŭskaj spravy i finansaŭ.
Zachaplajecca ŭschodnimi adzinaborstvami: trojčy čempijon Polščy pa kunh-fu.
