Jadlička pa darozie ŭ Charvatyju. Fota sa staronki Libierłenda na Facebook
Ułady Charvatyi zatrymali 9 maja hramadzianina Čechii Vita Jadličku za parušeńnie miažy, paviedamlaje Daily Caller sa spasyłkaj na aficyjny sajt Libierłenda — dziaržavy, abvieščanaj Jadličkam 13 krasavika.
Za sprobu nielehalnaha pierasiačeńnia miažy pa-za prapusknymi punktami prezident atrymaŭ štraf u 2400 charvackich kun (kala 358 dalaraŭ). Jadlička śćviardžaje, što viartaŭsia ŭ svaju dziaržavu Libierłend.
«Prezident» raspaviadaje, što niekalki hadzin sprabavaŭ patłumačyć pamiežnikam isnavańnie svajoj dziaržavy na «ničyjnaj» terytoryi. Pavodle jaho słoŭ, pamiežniki źviarnuli ŭvahu na «aktyŭnuju emihracyju» z Charvatyi ŭ Libierłend.
Jon śćviardžaje, što padčas razmovy z sudździoj vyśvietliłasia, što dzieci apošniaha ŭžo sprabavali trapić u Libierłend, ale ich spyniła palicyja.
«Heta była jašče adna dobrazyčlivaja sustreča, pa jakoj my mnoha śmiajalisia, — apisvaje Jadlička svajo zatrymańnie. — Taksama jon (sudździa — NN) skazaŭ, što luboha dobraha prezidenta kali-niebudź aryštoŭvali. U Češskaj Respublicy heta amal niepaźbiežna, kali ludzi z Čechii aryštoŭvajucca pierad tym, jak stać prezidentami».
Pa vypiscy štrafu palicyja adpuściła Jadličku, ciapier jon bavić čas ź pieršaj łedzi Libierłenda dy čakaje na hetym tydni kala 140 novych hramadzian svajoj krainy.
***
Libierłend byŭ abvieščany «niezaležnaj dziaržavaj» na terytoryi kala 7 km² miž Charvatyjaj i Sierbijaj na zachodnim bierazie Dunaja (maje suchaputnuju miažu tolki z Charvatyjaj). Nivodnaja dziaržava śvietu siońnia nie pryznaje jaho niezaležnaść. Pa zajavach Jadlički, nivodnaja dziaržava nie zajaŭlała svaich pravoŭ na hetuju terytoryju.
