U Minsku siońnia zrobleny praryŭ, jakoha čakali z 12 lutaha, zajaviŭ žurnalistam pradstaŭnik samaabvieščanaj Danieckaj Narodnaj Respubliki Dzianis Pušylin.

«Ździejśnieny praryŭ, jakoha, napeŭna, usie čakali z momantu padpisańnia kompleksu mier 12 lutaha. Zapuścilisia i pačali pracavać padhrupy, pryčym dosyć kanstruktyŭna», — skazaŭ jon.

Pavodle jaho słoŭ, uzhodnienyja pazicyi ŭ cełym. Jon vykazaŭ nadzieju, što ź siońniašniaha dnia pačniecca novy etap i atrymacca napoŭnić pracu padhrup kanstruktyvam. «Adpaviedna, nabližajecca paŭnavartasnaje pieramirje», — padkreśliŭ jon.

Pytańnie ŭviadzieńnia miratvorcaŭ siońnia nie abmiarkoŭvali, ale jano zastajecca na paradku dnia. Pra heta zajaviŭ žurnalistam były prezident Ukrainy Leanid Kučma.

«Hałoŭnaje dla nas — spynieńnie ahniu i advod ciažkich uzbrajeńniaŭ», — skazaŭ Kučma.

Leanid Kučma dadaŭ, što kožnaja z pracoŭnych hrup, pradstaŭniki jakich sustrakalisia siońnia ŭ biełaruskaj stalicy, budzie ŭ zaležnaści ad situacyi vyznačacca ź miescam sustrečy. «Ale, pa vialikim rachunku, pryniata rašeńnie, što pracoŭnyja hrupy sustrakajucca ŭ Minsku», — skazaŭ jon.

Novapryznačany pradstaŭnik rasijskaha boku ŭ trochbakovaj kantaktnaj hrupie pa Ukrainie Azamat Kulmuchamietaŭ nazvaŭ siońnia žurnalistam imiony rasijskich pradstaŭnikoŭ u pracoŭnych hrupach.

U hrupu pa biaśpiecy ŭvajšoŭ pradstaŭnik Hienštaba Uzbrojenych Sił Rasii Jarasłaŭ Maskal, u hrupu pa humanitarnych pytańniach — namieśnik ministra Rasijskaj Fiederacyi pa spravach hramadzianskaj abarony, nadzvyčajnych situacyjach i likvidacyi nastupstvaŭ stychijnych biedstvaŭ Uładzimir Ściapanaŭ, u hrupu pa palityčnych pytańniach — Maksim Palakoŭ, pasadu jakoha Azamat Kulmuchamietaŭ nie nazvaŭ. U hrupu pa ekanamičnych pytańniach uvachodzić namieśnik ministra ekanamičnaha raźvićcia Rasii Siarhiej Nazaraŭ.

U svaju čarhu Leanid Kučma adznačyŭ, što Ukrainu ŭ kožnaj pracoŭnaj hrupie pradstaŭlajuć «aksakały, jakija słoŭ na viecier nie kidajuć». Jon udakładniŭ, što pieršy kiraŭnik Słužby biaśpieki Ukrainy, jaki taksama zajmaŭ pasady premjer-ministra i ministra abarony, Jaŭhien Marčuk uvachodzić u hrupu pa biaśpiecy; były sakratar Rady nacyjanalnaj biaśpieki i abarony Ukrainy, jaki taksama zajmaŭ pasadu daradcy prezidenta Ukrainy Piatra Parašenki, Uładzimir Harbulin — u hrupu pa palityčnych pytańniach; deputatka Viarchoŭnaj rady Iryna Hieraščanka — pa humanitarnych pytańniach; pieršy namieśnik kiraŭnika hałoŭnaha departamienta pa pytańniach ŭkaranieńnia reformaŭ Administracyi Prezidenta Ukrainy Ihar Vieramiej — pa ekanamičnych pytańniach.

Nastupnaja sustreča padhrupy pa biaśpiecy moža prajści 19 maja, zajaviŭ Kučma.

Śpiecyjalnaja pradstaŭnica ABSIE Chajdzi Taljavini adznačyła, što, jak płanujecca, najbližejšaja sustreča adbudziecca ŭ Minsku 16 maja — źbiarecca padhrupa pa ekanamičnych pytańniach. Jašče dźvie padhrupy — pa palityčnych i humanitarnych pytańniach — majuć sustrecca ŭ Minsku 19 maja. Padhrupa pa biaśpiecy budzie pracavać u rehijonie, skazała śpiecpradstaŭnica ABSIE, majučy na ŭvazie — na miescach, u Danbasie.

Ukrainskija ŚMI ŭ repartažach pa vynikach sustrečy akcentujuć uvahu na toje, što havorki pra ŭvod miratvorcaŭ na Danbas nie było.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?