Pradstaŭniki Biełaruska-Amierykanskaha Zadzinočańnia (BAZA), arhanizacyi biełaruskaj dyjaspary ŭ Vašynhtonie, sustrelisia 29 krasavika z namieśnikam pamočnika dziaržaŭnaha sakratara Złučanych Štataŭ Erykam Rubinam. Padčas hutarki byli abmierkavanyja lutaŭskaja pajezdka Rubina ŭ Minsk, pierśpiektyvy raźvićcia dvuchbakovych dačynieńniaŭ i pazicyja ZŠA pa prezidenckich vybarach u Biełarusi.
Rubin stanoŭča acaniŭ pajezdku ŭ Biełaruś, u tym liku, i sustreču z Alaksandram Łukašenkam. Razam z tym, palapšeńnie miždziaržaŭnych adnosinaŭ mahčyma tady, kali abodva baki buduć rabić praktyčnyja kroki nasustrač adzin adnamu. Raźvićcio handlova-ekanamičnaha i inviestycyjnaha supracoŭnictva stanie mahčymym paśla vyzvaleńnia palityčnych źniavolenych i stvareńnia ŭmovaŭ dla demakratyčnaha pracesu ŭ Biełarusi, u tym liku praviadzieńnia vybaraŭ na naležnym uzroŭni.
Amierykanski dypłamat zapeŭniŭ, što prablematyka pravoŭ čałavieka zastajecca centralnaj pry vyznačeńni palityki Złučanych Štataŭ datyčna Biełarusi. ZŠA praciahnuć nadavać uvahu spravam ab źnikłych biełaruskich palitykach i palityčnych źniavolenych.
U hetaj suviazi pakazalna, što, niahledziačy na aktyvizacyju dvuchbakovych kantaktaŭ apošnim časam, ZŠA padtrymlivajuć mandat śpiecyjalnaha dakładčyka AAN pa situacyi z pravami čałavieka ŭ Biełarusi, jaki, vierahodna, budzie praciahnuty na jašče adzin hod padčas siesii Rady pa pravach čałavieka AAN u červieni. Złučanyja Štaty taksama ŭ červieni majuć namier praciahnuć sankcyi ministerstva finansaŭ suprać fizičnych i jurydyčnych asobaŭ, uviedzienyja rašeńniem prezidenta ZŠA paśla prezidenckich vybaraŭ u Biełarusi 2006 hoda. Abodva zachady buduć zastavacca na paradku dnia ZŠA, kali tolki va ŭnutranaj palitycy Biełarusi nie adbuducca značnyja źmieny.
Acenka budučych prezidenckich vybaraŭ źjaŭlajecca składanym pytańniem dla Dziarždepartamienta. Zaraz u Biełarusi adsutničajuć umovy dla palityčnaj kankurencyi. Sprava nie tolki ŭ niaroŭnych umovach viadzieńnia vybarčych kampanij. Metanakiravanyja dziejańni ŭłady značna asłabili palityčnuju apazicyju. Mikałaj Statkievič, kandydat na minułych vybarach, da hetaha času źniavoleny, niekatoryja palityki i aktyvisty vymušana pakinuli Biełaruś i nie mohuć brać udziełu ŭ vybarach.
Niedastatkova pravieści biezdakorna tolki dzień hałasavańnia. Aceńvacca buduć usie pieryjady vybarčaj kampanii. Dla Złučanych Štataŭ važna nie tolki kab usie palitźniavolenyja byli vyzvalenyja, ale kab ułada admoviłasia ad novych aryštaŭ i prysudaŭ. Važna taksama adnavić roŭny dostup palityčnych siłaŭ da srodkaŭ masavaj infarmacyi, nie pieraškadžać svabodzie schodaŭ. Nieabchodna, kab biełaruskaja ŭłada svoječasova dazvoliła naležnaje mižnarodnaje nazirańnie za vybarami misijaj Ofisu pa demakratyčnych instytutach i pravach čałavieka ABSIE.
Złučanyja Štaty buduć uvažliva nazirać za prezidenckaj kampanijaj i za ŭmovami jaje praviadzieńnia na ŭsich etapach i rabić adpaviednyja vysnovy. Svaju pazicyju pa acency vybaraŭ na ŭsich etapach ZŠA buduć kaardynavać ź Jeŭrapiejskim Źviazam.
