Ministerstva finansaŭ Biełarusi pryniało rašeńnie ab spynieńni z 1 maja 2015 hoda dziejańnia śpiecyjalnych dazvołaŭ (licenzij) na ažyćciaŭleńnie strachavoj dziejnaści, vydadzienych AAST «Bahač» i zamiežnamu ŭnitarnamu strachavomu pradpryjemstvu «Cepter Inšurans». Pra heta havorycca ŭ paviedamleńni Minfina.
«U chodzie kantrolnych mierapryjemstvaŭ, jakija pravodziacca Ministerstvam finansaŭ adnosna adkrytaha akcyjaniernaha strachavoha tavarystva «Bahač» i zamiežnaha ŭnitarnaha strachavoha pradpryjemstva «Cepter Inšurans», byli vyjaŭleny parušeńni patrabavańniaŭ zakanadaŭstva ab strachavańni, što vyraziłasia ŭ adsutnaści ŭ poŭnym abjomie na rachunkach u bankach Biełarusi hrašovych srodkaŭ u sumie, jakaja adpaviadaje minimalnamu pamieru statutnaha fondu», — adznačajecca ŭ paviedamleńni.
Dziejańnie licenzij kampanij spačatku było prypyniena. Adnak jany nie ŭstaranili parušeńni zakanadaŭstva ab strachavańni, kanstatuje Minfin. Taksama, pavodle infarmacyi finansavaha viedamstva, hetymi subjektami strachavoha rynku da 1 maja 2015 hoda statutnyja fondu nie sfarmiravanyja (nie pavialičanyja) va ŭstanoŭlenym abjomie i nie zabiaśpiečanyja hrašovymi srodkami na rachunkach u bankach Respubliki Biełaruś u sumie, jakaja adpaviadaje minimalnamu pamieru statutnaha fondu.
Jak adznačajuć u Minfinie, ciapier, zhodna z zakanadaŭstvam, nazvanyja strachoŭščyki abaviazanyja pieradać abaviazacielstvy pa raniej zaklučanych imi dahavorach dobraachvotnaha strachavańnia inšaj strachavoj arhanizacyi abo ažyćciavić skasavańnie takich dahavoraŭ (za vyklučeńniem vypadkaŭ uźniknieńnia abaviazacielstvaŭ pa ažyćciaŭleńni strachavych vypłat) i viarnuć strachavalniku častku strachavoha ŭznosu ŭ adpaviednaści z umovami praviłaŭ dobraachvotnaha strachavańnia, na jakich jany byli zaklučanyja. Pry hetym strachavaja arhanizacyja pavinna vykanać abaviazacielstvy pa ažyćciaŭleńni strachavych vypłat, jakija ŭźnikli da skasavańnia dahavoraŭ dobraachvotnaha strachavańnia.
Ministerstva finansavaŭ paviedamlaje, što va ŭstanoŭleny zakanadaŭstvam termin vyznačyć strachavyja arhanizacyi, jakim budzie dadziena prava na pryniaćcie abaviazacielstvaŭ adkrytaha akcyjaniernaha strachavoha tavarystva «Bahač» i zamiežnaha ŭnitarnaha strachavoha pradpryjemstva «Cepter Inšurans».
