Fota: healthination.com
Hrupa navukoŭcaŭ centra čałaviečaj hienietyki Wellcome Trust u Łondanie apublikavała u časopisie Current Biology daśledavańnie niepasrednaha ŭpłyvu depresii na hieny čałavieka.
Padčas analizu hienaŭ 11 tysiač čałaviek navukoŭcy šukali hieny, što padvyšali by ryzyku raźvićcia depresij. Ale niečakana dla siabie znajšli ślady ŭpłyvu depresii ŭ pavieličeńni abjomaŭ mitachandryjalnaj DNK.
«My vyjavili niečakanuju suviaź miž enierhietykaj kletak i ciažkoj depresijaj, što raniej razhladałasia jak rasstrojstva nastroju», — tłumačyć prafiesar Džonatan Flint. Pa jaho słovach, navukoŭcy spačatku nie pavieryli svaim vynikam.
Dla paćvierdžańnia teoryi navukoŭcy daśledavali łabaratornych myšej, što pieražyli stres ciaham 4 tydniaŭ. Źmieny ŭ ich uzroŭni mitachandryjalnaj DNK nasamreč vyklikalisia harmonam stresu kartykasteronam (u myšej bolš aktyŭnym, čym u čałavieka). Taksama stres vyklikaŭ u myšej źmianšeńnie ciełamieraŭ (kancavych učastkaŭ chramasom), što naŭprost upłyvaje na praciahłaść žyćcia.
Ale źmieny byli zvarotnymi — kali myšej vyvodzili sa stresu, DNK adnaŭlałasia.
Depresija moža być mietabaličnym adkazam na stres, ličać navukoŭcy. Kolkaść mitachandryjalnaj DNK pavialičvajecca, kab stvarać bolš enierhii dla cieła, jakoje słabnie ŭ baraćbie sa stresam.
Mahčyma, źmieny mitachandryjalnaj DNK atrymajecca vykarystać jak markier stresu dla dyjahnostyki i nastupnaha lekavańnia kliničnych depresij.
