Na biełaruskim učastku naftapravoda «Družba» pablizu ahraharadka Babovičy Homielskaj vobłaści zdaryłasia avaryja.
Paviedamleńnie ab paryvie naftapravoda na terytoryi naftapierahonnaj stancyi «Homiel» pastupiła ŭ MNS u 1.15. Prarvała technałahičny naftapravod Unieča — Mazyr dyjamietram 530 mm z rabočym ciskam 45 atmaśfier na hłybini kala 1,7 m. Hety ŭčastak znachodzicca ŭ rasparadžeńni AAT «Homieltransnafta Družba» kancerna «Biełnaftachim».
Płošča raźlivu nafty skłała kala 0,06 ha. Dla likvidacyi hetaha praryvu naftapravoda i vydaleńnia zabrudžanaha hruntu na miescy zdareńnia pracujuć 11 adzinak techniki i 26 supracoŭnikaŭ AAT «Homieltransnafta Družba».
«Ale transparciroŭka nafty ŭ mahistralnym naftapravodzie ažyćciaŭlajecca ŭ štatnym režymie biez pamianšeńnia abjomaŭ płanavaj pastaŭki. Paciarpiełych niama», — paviedamiŭ dziažurny.
AAT «Homieltransnafta Družba» zabiaśpiečvaje tranzit rasijskaj i kazachstanskaj nafty ŭ Polšču, Hiermaniju, Ukrainu, Vienhryju, Słavakiju, Čechiju, a taksama pastaŭku rasijskaj i biełaruskaj nafty na AAT «Mazyrski NPZ», transparciroŭku biełaruskaj nafty na ekspart.
