Biełaruskaje hramadska-kulturnaje tavarystva Sankt-Pieciarburha 25 sakavika adznačyła Dzień Voli. Śviatkavańnie 97-j hadaviny stvareńnia Biełaruskaj Narodnaj Respubliki pad bieł-čyrvona-biełymi ściahami adbyłasia ŭ Biblijatecy nacyjanalnaściaŭ.
Vioŭ uračystuju sustreču staršynia tavarystva Mikałaj Nikałajeŭ. Udzielniki sustrečy zrabili dakłady ab historyi stvareńnia BNR u sakaviku 1918 hoda, abmierkavali ŭmovy, u jakich paŭstała Narodnaja Respublika, a taksama pryčyny jaje parazy.
Akramia hetaha siabry Biełaruskaha hramadska-kulturnaha tavarystva abmierkavali płany i hałoŭnyja kirunki dziejnaści abjadnańnia. Było pryniata rašeńnie ab detalnaj raspracoŭcy maršrutaŭ pa biełaruskich miaścinach Sankt-Pieciarburha. Abmiarkoŭvałasia taksama pytańnie infarmacyjnaj pracy i raspaŭsiudu ŭ siecivie infarmacyi ab dziejnaści tavarystva.
Mikałaj Nikałajeŭ paviedamiŭ, što 15 červienia zapłanavanaja štohadovaja sustreča biełarusistaŭ.
U suviazi z hetym staršynia tavarystva zaprasiŭ usich žadajučych zrabić dakłady ab historyi biełarusaŭ u Pieciarburzie. Mastak Janka Čarniakievič zaprasiŭ na svaju vystavu, što adbudziecca naprykancy traŭnia ŭ Akademii mastactvaŭ imia Šcihlica.