Finskija navabrancy prymajuć prysiahu paśla zakančeńnia bazavaha kursu vajskovaj padrychtoŭki.
Pryčynaj hetaha stała rasijskaja anieksija Kryma i raspalvańnie Maskvoj kanfliktu na ŭschodzie Ukrainy, što vyklikała zaniepakojenaść va ŭsich zachodnich susiedziaŭ RF.
Samaj pieršaj u 2014 hodzie viarnułasia da pryzyvu Ukraina, jakaja na fonie vajny amal z nula pačała stvarać novuju armiju. Pryzyŭ va Ukrainie admianiŭ u 2013 hodzie tahačasny prezident Viktar Janukovič.
U sakaviku 2015 hoda Litva viarnuła pryzyŭ u vojska — pakul što na 5 hadoŭ.
«U adkaz na źmieny ŭ hieapalityčnaj situacyi ŭ rehijonie my musim dadatkova ŭzmacnić našyja abarončyja mahčymaści. Takim čynam było pryniataje rašeńnie časova adnavić abaviazkovuju vajskovuju słužbu», — cytuje słovy premjer-ministra Alhirdasa Butkiavičusa sajt defensenews.com.
Pra viartańnie da pryzyvu dumaje i Łatvija, a Estonija i nie admaŭlałasia ad jaho.
U vyniku pry nasielnictvie trochi bolšym za 1,3 młn čałaviek Estonija maje 219 000 reziervistaŭ, a taksama 22 500 čałaviek u dobraachvotnickaj Lizie Abarony Estonii.
U Čechii, jakuju čamuś niechta ličyć prarasijskaj, urad taksama płanuje adnavić abaviazkovuju vajskovuju słužbu, piša praguemonitor.com sa spasyłkaj na hazietu Mlada fronta Dnes. Pry hetym taki krok padtrymlivaje 63% čechaŭ.
«Čas surjozna dumać pra toje, jak dziaržava budzie abaraniacca ad napadu. Chto jaje abaronić da taho, jak nam na dapamohu paśpiejuć sajuźniki? Sučasnaja 20-tysiačnaja armija niazdolnaja abaranić našu terytoryju. U nas niama padrychtavanych reziervistaŭ. Niama inšaha varyjantu, jak znoŭ vučyć moładź vykarystoŭvać zbroju dla abarony krainy», — zajaviŭ premjer Bahusłaŭ Sobatka.
«Prykład Ukrainy demanstruje, što kanflikty mohuć chutka raspaŭsiudžvacca i adbyvacca adnosna blizka (ad Čechii)», - adznačyŭ ministr abarony Čechii Marcin Strapnicki.
U Polščy viarnucca da pryzyvu zaklikaje hałoŭnaja apazicyjnaja partyja «Prava i Spraviadlivaść».
Jaje ŭ hetym pytańni padtrymlivajuć jak minimum 60 adsotkaŭ apytanych, piša hazieta Rzeczpospolita sa spasyłkaj na vyniki daśledvańnia instytuta Homo Homini. Rašuča suprać pryzyŭnoj armii vykazalisia ŭ sakaviku 2015 hoda tolki 14% palakaŭ.
Taksama zachoŭvajuć abaviazkovuju terminovuju słužbu ŭ našym rehijonie Finlandyja, Małdova, Narviehija. Amal usie astatnija majuć zakony, jakija dazvalajuć chutka ŭvieści pryzyŭ u vypadku vajny.
Hetak, naprykład, padčas Pieršaj suśvietnaj vajny ŭ 1916 hodzie Vialikabrytanija pačała pryzyvać rekrutaŭ na słužbu, u mirny čas admianiła jaho, a potym uviała jaho znoŭ u 1939 hodzie, kali pačałasia novaja suśvietnaja vajna.
Žaŭniery estonskaj armii.
Doŭhi čas byŭ raspaŭsiudžany mif ab tym, što čysta dobraachvotnickaja armija - harantyja vysokaj efektyŭnaści, a pryzyŭ niesumiaščalny z prafiesijanalizmam i vysokaj bajazdolnaściu vojska.
Adnak apošnija padziei ŭ Ukrainie i tendencyi abaronnaj palityki ŭ susiednich krainach, vidać, śviedčać ab tym, što navat u vysokatechnałahičnaj vajnie masavy pryzyŭ i padrychtavanyja rezervisty dajuć pieravahu toj krainie, jakaja jaho ŭvodzić.
Z hetaha punktu hledžańnia toje, što Biełaruś zachavała pryzyŭ, dapamahaje zachoŭvać abaronazdolnaść krainy. Ale inšaja sprava, što luboj armii patrebnaje dobraje zabieśpiačeńnie — hrošy na techniku, paliva i ŭsie inšaje dla padtrymańnia bajazdolnaści, dla rehularnych i intensiŭnych vučeńniaŭ pryzyŭnikoŭ i sałdataŭ rezervu. I nie ŭ apošniuju čarhu - na dobryja zarobki i sacyjalnyja harantyi dla vajskoŭcaŭ.
Pryzyŭnyja izrailskaja, šviejcarskaja, finskaja, paŭdniovakarejskaja armii nie karystalisia b takoj pavahaj, kab nie dobraje finansavańnie.
I voś tut my sa svaim vajennym biudžetam u prykładna 750 młn dalaraŭ zaŭvažna adstajem ad tych ža palakaŭ, jakija na svajo vojska vydatkoŭvajuć bolš za 11 młrd dalaraŭ.
Ale, mahčyma, jašče bolš za niedastatkovaje zabieśpiačeńnie bje pa biełaruskaj armii sumniŭnaja jakaść biełaruskaha patryjatyčnaha vychavańnia ŭ dziaržaŭnych ŚMI, škole, armii, panavańnie rasiejskaha infarmacyjnaha pradukta na telebačańni, zaniadbany stan biełaruskaj movy.
Jak pierakanać hramadzianina vajavać za svabodu Biełarusi, kali dziaržaŭnyja i vajskovyja ŚMI ŭsłaŭlajuć amal vyklučna pieramohi armii toj krainy, razvał jakoj u 1991 hodzie i daŭ Biełarusi niezaležnaść?
