Na niekalkich internet-sajtach źjaviŭsia tekst z abvinavačvańniami ŭ płahijacie pieršaha prarektara Minskaj duchoŭnaj sieminaryi protaijereja Andreja Cyhiela. Vierahodna, pieršakrynicaj tekstu jość sajt danuvius.orthodoxy.ru.
Aŭtar zajaŭlaje, što znajšoŭ u tekstach Cyhiela šmat płahijatu, pryvodzić paraŭnalnuju tablicu ŭryŭkaŭ z tekstu Cyhiela i samastojna znojdzienych mierkavanych krynic. Jon prychodzić da vysnovy pra «vyjaŭleńnie niedapuščalnych pazyčeńniaŭ čužoha tekstu» dy miarkuje, što Cyhiel prypisvaje sabie čužyja teksty cełymi abzacami.
Jak raspavioŭ «Našaj Nivie» Andrej Cyhiel, jon nie zhodny z abvinavačańniami i sumniajecca ŭ kampietentnaści aŭtara tekstu, ale nie znajšoŭ sposab źviazacca ź ich aŭtaram.
Tekst abvinavačańnia padpisany «Varabjoŭ Siarhiej Uładzimiravič, kandydat fiłałahičnych navuk».
Napraŭdu, pošuk u internecie vydaŭ niekalki ludziej z takim imiem. Ale adzin ź ich — doktar histaryčnych navuk Mižnarodnaha jurydyčnaha instytuta ŭ Maskvie, druhi — kandydat piedahahičnych navuk ź nienazvanaj ustanovy ŭ Maskvie. Kandydata fiłałahičnych navuk z takim imiem Google nie viedaje. Pra abodvuch znojdzienych taksama niašmat źviestak.
Andrej Cyhiel napisaŭ zajavu ŭ milicyju, kab pravaachoŭčyja orhany pravieryli realnaść isnavańnia takoha čałavieka.
