Słužba biaśpieki Ukrainy apublikavała na svajoj staroncy zapis čarhovaha dopytu rasijskich žaŭnieraŭ, jakija patrapili va ŭkrainski pałon padčas bajoŭ u rajonie Iłavajska letam 2014 hoda, paviedamiŭ na svajoj staroncy kamandzir bataljona «Danbas» Siamion Siamienčanka.
«Vajskoŭcy RF, jakich uziali ŭ pałon bajcy «Danbasa» pry vychadzie ź Iłavajska. Čarhovy dokaz prysutnaści vojskaŭ RF na Danbasie», — napisaŭ Siamienčanka.
Na videa pałonnyja nazyvajuć svaje imiony i imiony pa baćku (proźviščy SBU zahłušyła), a taksama bajavyja adzinki, u jakich słužać. Heta 31 desantna-šturmavaja bryhada i 6 asobnaja tankavaja bryhada.
«Mamy, taty, hladzicie, vašyja dzieci tut. Jany žyvyja i zdarovyja. Kali ŭ nas atrymajecca, my vyviedziem ich adsiul žyvymi i zdarovymi. Zrazumiejcie nas, nam niepatrebnaja lišniaja kroŭ. Ale vy tam u Rasii pastarajciesia, kab inšyja takija dzieci nie pryjechali na hetuju ziamlu», — kaža ŭ kancy ŭkrainiec, jaki vioŭ dopyt.
Pad Iłavajskam u kancy žniŭnia 2014 hodu tankavyja i matastrałkovyja častki rasijskaj rehularnaj armii nanieśli kontrudar pa nastupajučych ukrainskich vojskach. U vyniku RF uratavała svaje maryjanietačnyja ŭtvareńni «DNR» i «ŁNR», jakija tady stajali na miažy poŭnaha źniščeńnia, i adkinuła ŭkraincaŭ prykładna na siońniašnija pazicyi.
Ukraincy praryvalisia z atočanaha rasiejcami Iłavajska i padčas praryvu zachapili niekalki pałonnych, dopyt jakich patrapiŭ na videa. Potym rasiejcaŭ viarnuli ŭ RF, paviedamiŭ aficer «Danbasa» M. Bielaŭcoŭ.
Raniej ekśpierty i ŚMI, jak zachodnija i ŭkrainskija, hetak i rasijskija, nieadnarazova adznačali najaŭnaść rasijskich vojskaŭ i ciažkich uzbrajeńniaŭ na baku antyŭkrainskich sił na ŭschodzie Ukrainy.
Letam 2014 hoda va ŭkrainski pałon patrapiła jašče adna hrupa rasijskich žaŭnieraŭ z braniatechnikaj, jakaja potym była abmienienaja na ŭkrainskich pałonnych. Minabarony RF spačatku admaŭlała fakt najaŭnaści rasijskich žaŭnieraŭ na Danbasie, potym pradstaŭnik ustanovy zajaviŭ, što jany trapili va Ukrainu «vypadkova».
