U Jeŭropie parki, skviery, prysady kala damoŭ nie abrazajuć kala ziamli, a ŭ nas abrazajuć tak, kab praśviečvałasia na kiłamietr. Dyj dobra kali abrazajuć. U nas stolki lesapałosaŭ, drevaŭ u haradach prosta pad korań vyrazali. U Jeŭropie starajucca, kab zielanina raździalała, kab vočy čałavieka adpačyvali na joj, kab čałaviek u parku moh schavacca. U nas — inšaja estetyka i fiłasofija. Cikavy dopis na hetuju temu zrabiŭ Viktar Małyščyc ź Minska.
Horadnia, vulica Elizy Ažeški, 1969 hod. Fota z Natalla Doraš, Facebook.com.
Chocimsk, fota Siarhieja Hudzilina.
Niejak supracoŭnik biełaruskaj ambasady ŭ Bierlinie raskazaŭ mnie pra kiraŭnika adnaho z rajonaŭ Minska, jaki, ubačyŭšy adzin park niamieckaj stalicy, skazaŭ: «U Minsku za taki paradak mianie vyhnali b z pracy». U toj momant my jakraz prajazdžali kala hetaha bierlinskaha parku. U im była trava, nievysokaja, ale i nie vykašanaja pad korań, było šmat duchmianych kustoŭ (travień ža!) i, kaniečnie, bieźlič roznych drevaŭ. Chaciełasia prosta vyjści tut i zastacca ŭ hetym zialonym rai nadoŭha.
U takija momanty stanovicca sapraŭdy kryŭdna, što našy miascovyja čynušy ŭ jakaści sinonimaŭ da słovaŭ «paradak» i «pryhažość» vybirajuć «asfalt», «bieton», «plitka», «pole».
Kaniečnie, u jaho rodnaj kazarmie roŭny płac biez kuścika i dreva — pakazčyk paradku i zaruka pavyšeńnia pa słužbie.
U maim rodnym Hłybokim užo amal nie zastałosia dreŭ, zatoje ciapier možna lubavacca fasadami chibar stalinskich časoŭ.
U Harodni na Savieckaj viertykalna stajać zastalisia chiba što niahiehłyja lichtarnyja słupy, zatoje ciapier sterylna, jak u reanimacyi.
Kastryčnickaja płošča ŭ Minsku ci Płošča dziaržaŭnaha ściaha — voś apafieoz i ideał biełaruskich uparadkavalnikaŭ! Učora, idučy la Pałaca Respubliki, sam navat žachnuŭsia ad maštabaŭ hetaha plitkavaha raju.
Kali ja baču bietonnyja astravy turkmienskich ci ŭźbiekskich haradoŭ, mnie paniavoli ŭzhadvajucca našy płoščy i vulicy — takija ž biaskrajnija i pustyja. Ale azijatam možna — u ich navokał i tak stepy i pustyni. U nas ža pustyni čaściej u hałavach.
