Uładzimir Stanilevič - načalnik adździeła pa masavych mierapryjemstvach milicyi hramadskaha paradku MUS.
Hety kruhły stoł anansavaŭsia daŭno. Napiaredadni žurnalisty zrabili zvanki ŭ pres-słužbu Biełaruskaj fiederacyi futboła. «Pačatak a 12, prychodźcie, kali łaska», — adkazali tam. Ale čamuści ŭ pryznačany čas supracoŭniki Doma futboła pradstaŭnikoŭ ŚMI ŭ kanfierenc-zału nie puskali. Rabočaja sustreča, nie pałožana.
Daviałosia dačakacca namieśnika staršyni BFF Siarhieja Safarjana, jaki taksama spačatku admaŭlaŭ, ale paśla zdaŭsia pad naporam žurnalistaŭ. «Zachodźcie», — koratka huknuŭ jon. Praŭda, potym nie admoviŭ sabie ŭ zadavalnieńni pračytać lekcyju žurnalistam, što tak nie robicca.
U svaim ustupnym słovie Safarjan havaryŭ pra źnižeńnie naviedvalnaści čempijanatu. «My sprabujem praanalizavać, u čym korań hetaha ŭsiaho». Jon zaklikaŭ da parłamienckaj formy viadzieńnia dyskusii biez prydzirak z abodvuch bakoŭ.
Paśla hetaha słova ŭziaŭ Uładzimir Stanilevič, načalnik adździeła pa masavych mierapryjemstvach milicyi hramadskaha paradku MUS. Jon zrabiŭ nievialikuju spravazdaču, dzie paviedamiŭ kolki za minuły hod fanatami było ździejśniena pravaparušeńniaŭ. Zafiksavanyja 24 vypadki vykarystańnia «niezarehistravanaj simvoliki», 16 — piratechniki, a taksama 5 niesankcyjanavanych šeściaŭ.
«Supracoŭnikaŭ milicyi na stadyjonach budzie roŭna stolki, kolki patrebna dla padtrymki biaśpieki. U nas pravaachoŭnikaŭ na arenach nie bolš, čym u inšych krainach», — skazaŭ Stanilevič.
Milicyja skazała, što padtrymlivaje stvareńnie pry kłubach aficyjnych abjadnańniaŭ balelščykaŭ, tak zvanych fan-kłubaŭ. «Kab jany dziejničali ŭ pravavym poli, a nie byli chulihanami», — adznačyŭ milicyjant. Dla tych, chto ŭstupić u takija abjadnańni, praduhledžanaja cełaja sistema prefierencyj. Naprykład, arhanizavanyja vyjezdy na haściavyja matčy. U hetych ža fan-kłubach buduć vieścisia prafiłaktyčna-tłumačalnyja hutarki ab niedapuščalnaści parušeńnia zakonaŭ.
Možna skazać, što heta takaja svojeasablivaja forma kantrolu, tamu fanaty nie chočuć stvarać takija hrupy. Na siońnia jany źjavilisia tolki ŭ BATE, «Homieli», minskim i bresckim «Dynama».
«Milicyja nie bačyć va ŭsich balelščykach złačyncaŭ. Siarod usich jość čałaviečy faktar, jaki pavinien vyrašacca na miescy. Nadhlad jak byŭ, tak i budzie», — skončyŭ pramovu spadar Stanilevič.
Pieršym nie vytrymaŭ fanat kłuba «Biełšyna» Artur Žohal: «A praz aŭtazaki pa-raniejšamu budziecie prapuskać fanataŭ?»
«Kali ŭładalniki stadyjonaŭ ustalujuć pałatku, ci zrobiać inšaje pamiaškańnie dla dadatkovaha nadhladu, to praz aŭtazak prapuskać nie budziem. Kali budzie ŭstalavany radyjochvalevy skanier, to prablem nie budzie zusim. Nie treba ŭsprymać heta jak prynižalnuju praceduru». Zała na hetym nie nadta ŭchvalajučy zahudzieła.
«U nas niekanstruktyŭny dyjałoh», — pačułasia praź niejki čas ad milicejskaha načalnika.
Žohal nie spyniaŭsia, havoračy pra toje, što supracoŭniki AMAPa viaduć siabie niekulturna, chamiać. Jon pryvioŭ taki prykład z hulni ŭ Salihorsku. «Ja zapytaŭsia, a dzie vaš staršy?» U Maskvie, adkazali mnie. Vy ličycie heta narmalnym?»
«Ja liču, što heta nieadekvatna. Ale nie ŭpeŭnieny, ci mieła heta miesca być. Źviartajciesia pa parušeńniach u MUS, ci prakuraturu».
«Ja nie baču sensu heta rabić, u našaj krainie sistemu nie pałamaješ», — adkazaŭ supracoŭnik kłuba.
Urešcie bok fanataŭ zaniaŭ i funkcyjanier BFF Safarjan. «Navat mnie milicyjanty kažuć: «Stoj, kudy ty idzieš?» Mnie heta taksama staić upopierak horła. Milicyjanty ž taksama niekudy chodziać u park, u kino. Ja prašu, kab vy dali zahad razmaŭlać ź ludźmi jak sa svajakami. Vy im uśmichajciesia, jany vam uśmichajucca».
Jašče adzin prykład ad Safarjana miažuje z poŭnym siurrealizmam. Hulcoŭ italjanskaj «Fijarenciny» ŭ poŭnym kamplekcie formy nie puskali na trenirovačnaje pole dva supracoŭniki milicyi. «Nu heta ž absurd, kali italjanskich futbalistaŭ pa-rusku pytajucca, ź jakoj metaj vy idziecie na pole? Nie zaŭsiody chočacca pisać listy pratestu, mnohich kanfliktaŭ možna paźbiehnuć». Ci inšy prykład, kali milicyja nie daje pranieści futbalistam butelki z vadoj. Maŭlaŭ, a ci vada tam.
Urešcie było damoŭlena, što supracoŭnik kłuba ciapier zmoža prysutničać na milicejskim instruktažy pierad hulnioj, dzie zmoža rastłumačyć svaju pazicyju, danieści prośby fanataŭ.
Šmat havorki datyčyła banieraŭ i prablemy ich rehistracyi. Varta nahadać, što ŭ Biełarusi na futbolnych matčach možna vyviešvać tolki tyja transparanty, jakija byli ŭzhodnienyja ź milicyjaj. Śpiecyjalist pa biaśpiecy FK «Minsk», jakoha nazyvali prosta «Antonyč», na cudoŭnaj trasiancy tłumačyŭ, ź jakimi prablemami jamu davodzicca sutykacca, kab zarehistravać banier.
«Adpisvajuć mnie: nie adpaviadaje normam. A jakim normam, choć by słova skazali. Nu moža jon utvaraje mižnarodnuju pahrozu ci padryvaje biaśpieku ekanomiki Respubliki Biełaruś».
«U vas šmat inšych banieraŭ, vykarystoŭvajcie ich», — adkazvaje supracoŭnik minskaj milicyi.
Antonyč nie supakojvaŭsia. «Ja dajšoŭ da načalnika milicyi hramadskaj biaśpieki HUUS Alaksandra Ioskina. Prychodžu da jaho ŭ kabiniet, a jon mnie kaža, što prymaje naviedvalnikaŭ tolki ŭ vyznačanyja časy. Ale ž jon siadzić siemački łuskaje i nie moža mianie pryniać».
Jość jašče pytańnie nie tolki «adviečnych» banieraŭ, jakija visiać ad hulni da hulni, ale i situacyjnych. Naprykład, futbalist Kola zabiŭ 100 hałoŭ i siektar jaho z hetym vinšuje, ci ŭ Vasi dzień naradžeńnia, ci ŭ Pieci syn naradziŭsia. Niaŭžo na ich rehistracyju taksama treba marnavać ad 15 da 30 dzion?
«A raptam Vasia, ci Piecia — siabry Hitlera», — zdajecca, hety arhumient Stanileviča «zabiŭ» mnohich.
Navat Siarhiej Safarjan nie vytrymaŭ: «U nas u fiederacyi pracavaŭ čałaviek ź imiem pa baćku Adolfavič, dyk što, jaho nie puskać u fiederacyju, a to raptam jon pazašlubny syn Hitlera?»
Pradstaŭnik minskaha «Tarpieda» papoŭniŭ skarbonku absurdnych historyj. U ich na siektary byŭ banier treniera Mikałaja Błaško. «Ciapier navat nam skazali, što nie prapuściać hety banier. Bo ŭ im pabačyli Banderu».
Milicyja ŭsio apraŭdvałasia, što fanaty majuć sotni chitrykaŭ, kab vykazać svaje palityčnyja pohlady. Naprykład, adnojčy byŭ praniesieny banier: «Fanaty choziajeva stadionov», dzie tłustym byli vyłučany litary ASAV, što ličycca abrazaj milicyi.
Pradstaŭnik minskaha «Dynama» skazaŭ, što za minuły hod pabyvaŭ na stadyjonach mnohich jeŭrapiejskich krain, i nidzie takoha presinhu na fanataŭ niama. «U Francyi našych chłopcaŭ, naprykład, abniuchaŭ sabaka, ale ž da ich navat nie dakranaŭsia nichto. Usio robicca z uśmieškaj. Nichto nie aburajecca. A to ŭ Homieli našaha namieśnika hiendyrektara kłuba prasili źniać abutak».
Atrymać niejkija istotnyja sastupki ad milicyi pradstaŭniki kłubaŭ tak i nie zmahli. Vyhladaje, što situacyja ź milicejskim nadhladam na stadyjonach sioleta nijak nie budzie adroźnivacca ŭ lepšy bok ad minułaha.
A voś supracoŭnik MNS pryznaŭ, što pry niekatorych ahavorkach vykarystoŭvać piratechniku na matčach budzie mahčyma.
