Biełaruskaja miasnaja pradukcyja ź śvininy ŭ bližejšy čas zmoža viarnucca na rasijski rynak. Pra heta ministr sielskaj haspadarki RF Mikałaj Fiodaraŭ paviedamiŭ u aŭtorak u Minsku paśla sumiesnaha pasiadžeńnia kalehii.
Fiodaraŭ adznačyŭ, što pastaŭki, pierakrytyja paśla vypadkaŭ vyjaŭleńnia ŭ pradukcyi biełaruskich vytvorcaŭ hienomu AČS, mohuć adnavicca «ciaham ličanych dzion».
«Leanid Kanstancinavič [Zajac, ministr sielskaj haspadarki i charčavańnia Biełarusi] prosić ciaham dvuch-troch dzion. Heta realna. Choć, mahčyma, nie na 100%», — adznačyŭ jon. Zajac dadaŭ, što raźličvaje na stanoŭčaje rašeńnie, u pryvatnaści, dla viadučych pradpryjemstvaŭ Biełarusi — ahrakambinataŭ «Snoŭ» i «Biełaviežski», Biarozaŭskaha miasakansiervavaha kambinata.
Siońnia pierad pasiadžeńniem sumiesnaj kalehii ŭ vuzkim kole baki abmierkavali pryčyny, pa jakich da hetaha času ekspart miasnoj pradukcyi ź śvininy byŭ abmiežavany.
«Absalutna davierliva i pa-tavarysku žorstka parazmaŭlali», — pryznaŭsia Fiodaraŭ, patłumačyŭšy, što AČS — prablema abjektyŭna vielmi niaprostaja.
«Naša zakanadaŭstva patrabuje, kab byli vyjaŭleny pryčyny źjaŭleńnia hienomu AČS u pradukcie kankretnaha zavoda — biełaruskaha ci rasijskaha. Biez vyjaŭleńnia pryčyn źjaŭleńnia rašeńnie pavisaje ŭ pavietry, i možna trymać hetuju situacyju i hod, i dziesiać hadoŭ. A niaredka byvaje, što amal niemahčyma vyjavić pryčynu źjaŭleńnia [hienomu AČS]. Nielha hadami trymać pradpryjemstva ŭ takim stanoviščy, što jano nie moža pastaŭlać svaju pradukcyju. Treba prymać rašeńnie», — zajaviŭ ministr.
«Chutka, siońnia-zaŭtra, jašče raz pravierać hetyja pradpryjemstvy našy śpiecyjalisty — na ekałahičnuju i vieterynarnuju biaśpieku. Kali hetaj pahrozy [AČS] niama, heta značyć pryčyna nie vyjaŭlena, to treba prymać rašeńnie, jakoje dazvalaje pradpryjemstvu pracavać i na źniešni rynak», — rastłumačyŭ Fiodaraŭ.
Pry hetym ministr sielskaj haspadarki Rasii upeŭnieny, što nijakaha miasnoha kanfliktu pamiž Biełaruśsiu i Rasijaj nie było.
«Byli patrabavańni nahladnych orhanaŭ z punktu hledžańnia adpaviednaści vieterynarnym i inšym standartam biaśpieki. Kožny orhan, i biełaruski i rasijski, pracavaŭ pa svaich nacyjanalnych standartach. Ale kali vy ličycie, što kanflikt byŭ, to jon pieraadoleny», — zapeŭniŭ jon.
Zaviaršajučy miasnuju temu, Mikałaj Fiodaraŭ pachvaliŭ biełaruskuju charčovuju pradukcyju: «Ja vyras u Savieckim Sajuzie. Ja i maje znajomyja pa hadach studenctva luby biełaruski pradukt usprymajem jak vielmi jakasny i smačny — sa studenckich hadoŭ hetyja simpatyi zastalisia».
Pavodle źviestak Biełstata, u 2014-m hodzie Biełaruś skaraciła ekspart u Rasiju śvininy amal u čatyry razy - da 11,5 tys. ton z 41,7 tysiačy ŭ 2013-m hodzie. U hrašovym vyrazie pastaŭki ŭpali bolš čym udvaja - da 57,4 młn dalaraŭ z 127,2 młn. Ekspart kaŭbasy skaraciŭsia na 31% - da 47,2 tysiačy ton, na 172,1 młn dalaraŭ (minus 32,6%).