Siarod dzieviatnaccaci siońniašnich pryznačeńniaŭ, jakija pravioŭ Alaksandr Łukašenka, jość tolki adna žančyna. Hanna Marjanaŭna Macielskaja stała kiraŭnikom administracyi Centralnaha rajona Minska. Nie tak šmat u nas žančyn-kiraŭničak navat na nizavym uzroŭni. Pryhledzimsia, chto ž jana takaja?
Spadaryni Macielskaj 45 hadoŭ. Jana rodam z Vałožynščyny, ź vioski Miejšty, što niedaloka ad Ivianca.
Paśla škoły Hanna Macielskaja pastupiła ŭ Minskaje kaapieratyŭnaje praftechvučylišča, dzie pravučyłasia hod. Paśla budučuju čynoŭnicu raźmierkavali ŭ Tałačynski rajon.
Spačatku Hanna Macielskaja pracavała zvyčajnaj pradavačkaj, paśla – zahadčycaj mahazina. Urešcie – instruktaram pa arhanizacyi i technicy handlu Tałačynskaha rajspažyŭsajuza.
U 1997 hodzie Hanna Macielskaja skončyła Homielski kaapieratyŭny instytut pa śpiecyjalnaści «tavaravied niecharčovych tavaraŭ».
Paśla niepraciahłaj pracy ŭ Viciebskim i Minskim abłspažyŭsajuzach žančynu zaprašajuć na pracu hałoŭnym śpiecyjalistam u Kamitet dziaržaŭnaha kantrolu, dzie jana zajmałasia manitorynham spažyvieckaha rynku i śfiery pasłuh (1999-2010).
Apošnija čatyry hady Hanna Macielskaja była pieršaj namieśnicaj kiraŭnika Administracyi Centralnaha rajona Minska.
Try cytaty:
«Pryjšli maje kalehi ŭ adnu z haradskich škoł, a tam – katlety prosta na pamyjcy. Akazvajecca, zamiest patrebnych 410 katlet kuchary pryhatavali 450 – dadali bolš chleba. Sorak porcyj źbiralisia zabrać dadomu, dy nie paśpieli – pryjšła pravierka.
Povary vykinuli śviežyja pradukty ŭ śmietnicu. Ale maje kalehi znajšli. I ŭvohule, u pavaroŭ takija tajniki, što prosta dzivu daješsia – u mojcy, na chlebnaj šafie, pad paddonymi z bulbaj, u skryniach z-pad jajek. Za kožnym povaram zamacavanaje svajo patajemnaje miesca» (Luty 2007).
«U Rasii, marskoj dziaržavie, surjozna staić prablema jakaści ryby, a ŭ nas jana jašče horšaja, tamu što da nas ryba pastupaje praź dziasiatyja ruki» (Studzień 2010).
«My prablemaj zachavańnia aŭtarskich pravoŭ zajmajemsia čas ad času. A treba vieści pastajannuju pracu. Akramia taho, kali ščyra, vielmi ciažka dakazvać vinu «pirataŭ» u sudach, asabliva kali havorka idzie pra kryminalnyja spravy» (Studzień 2010).
