Anžalika Borys atrymała papiaredžańnie ad śledčaha ŭ Haradzienskim kamitecie dziaržaŭnaha kantrolu.
Staršyni Hałoŭnaj rady niepryznavanaha biełaruskimi ŭładami Sajuza palakaŭ Anžalicy Borys paviedamili, što sprava ŭ adnosinach da jaje prypyniena. Razmova sa śledčym pavinna była adbycca jašče 9 sakavika, adnak była pieraniesiena pa nieviadomych pryčynach.
Pa słovach Borys, ułady sprabavali abvinavacić pradstaŭnikoŭ Sajuza palakaŭ u dziejnaści ad imia niezarehistravanaj arhanizacyi.
«Kryminalnaja sprava nie budzie ŭzbudžana, niama dla heta padstavaŭ. Ja była papiaredžana nibyta za dziejnaść ad imia niezarehistravanaj arhanizacyi – Sajuza palakaŭ. Kožny miesiac sa mnoj buduć pravodzicca prafiłaktyčnyja razmovy. Ja dumaju, što zaŭždy jość vierahodnaść adkryćcia spravy, kali ty zajmaješsia hramadskaj dziejnaściu. Tak jak hetaja sprava była ŭzbudžana pa niejkich danosach, tak jana i zavieršyłasia. Kaniešnie, pakolki sprava palityčnaja, to moža być, što siońnia zavieršyłasia, a zaŭtra stanie kryminalnaj».
Usie zaprašeńni ŭ kamitet dziaržkantrolu buduć rabicca praz advakata Anžaliki Borys, čas pieršaj prafiłaktyčnaj razmovy jašče nie pryznačany. Dla Anžaliki Borys siońniašniaje rašeńnie stała niečakanym padarunkam u śviatočny dzień: mienavita siońnia, 12 sakavika, 10 hadoŭ tamu jana była abranaja staršynioj niezaležnaha Sajuza palakaŭ.
