3 sakavika ŭ siecivie była prezientavanaja biełaruskamoŭnaja pieśnia słavutaha muzyki – Andrej Makarevič pieraśpiavaŭ pa-biełarusku «Śnieh», stary chit svajho hurta «Mašina Vriemieni». Razam ź pieśniaj na sajcie «Budźma biełarusami» źjaviłasia razhornutaja hutarka sa śpievakom, jaki, ŭ pryvatnaści, raskazaŭ pra svaje biełaruskija karani i staŭleńnie da Biełarusi.
— U toj samaj prahramie «Dreva žyćcia» čatyrochhadovaj daŭniny vy kažacie cikavuju frazu pra toje, što roźnicy miž biełarusami i rasiejcami pa sutnaści niama. Ci źmianiłasia vašaje mierkavańnie na hety kont siońnia?
— Roźnica jość, kaniečnie. Navat chacia b u staŭleńni da pryrody. U vas hetaje staŭleńnie jeŭrapiejskaje. U nas ža papsavanaje staŭleńnie da pryrody kačeŭnikami. Kačeŭniki pryzvyčailisia hadzić, bo jany nie siadziać na miescach — jany zaŭtra jeduć dalej. Dyk čaho kłapacicca pra čyściniu. Padazraju, što ŭ rasijcaŭ heta zastałosia z časoŭ tatarskaha jarma. U vas taksama historyja niaprostaja, tut to Polšča była, to Biełaruś, ale ŭsio ž heta Jeŭropa.
Vyčapiŭšy apošniuju frazu z kanteksta i zrabiŭšy akcent na dziejasłovie «hadzić», aŭtary «Rehnuma» zapuścili novuju chvalu ckavańnia Andreja Makareviča.
Makarevič, darečy, tyja samyja słovy kazaŭ i kancercie ŭ Minsku:
Užo siońnia na sajcie bujniejšaha rasijskaha infarmahienctva Lenta.ru źjaviłasia navina pad zahałoŭkam: «Makarievič rasskazał o privyčkie russkich hadiť».
Navina za ličanyja hadziny sabrała bolej za tysiaču kamientaroŭ, jakija zbolšaha nosiać abražalny dla muzyki charaktar.
U vyniku muzyka byŭ vymušany «apraŭdvacca za svaje słovy» ŭ efiry radyjo «Hovorit Moskva», tłumačačy, što nikoha nie chacieŭ pakryŭdzić.
«Ja ničoha kryŭdnaha nie mieŭ na ŭvazie, kažučy heta. Heta prosta peŭnyja rysy, jakija skłalisia histaryčna i pieradajucca ŭ spadčynu», – skazaŭ muzyka.
Infarmacyja pra heta iznoŭ źjaviłasia na sajcie Lenta.ru, hetym razam pad zahałoŭkam: «Makarievič otkazałsia priznavať oskorbitielnymi słova o privyčkie russkich hadiť».
Andrej Makarevič trapiŭ pad presinh rasijskich ŚMI praz toje, što nie padtrymaŭ palityku Rasii va Ukrainie, u pryvatnaści niekatoryja prapahandysckija telekanały nazyvajuć jaho «siabram chunty», a kancerty hurta «Mašina Vriemieni» admianiajucca adzin za adnym.
Treba zaŭvažyć, što ŭ Biełarusi reakcyja na pieśniu «Śnieh», praśpiavanuju pa-biełarusku, pazityŭnaja. Prykra ŭśviedamlać, što navat takaja biaskryŭdnaja padzieja moža vyklikać prapahandysckaje ckavańnie z boku siłaŭ, dalokich ad mastactva.
