Słužba biaśpieki Ukrainy ŭklučyła bolš za 100 rasijskich ŚMI ŭ pieralik časova zabaronienych dla akredytacyi pry ŭkrainskich dziaržaŭnych strukturach. U adkaz rasijski MZS abvinavaciŭ Kijeŭ u parušeńni mižnarodnych abaviazacielstvaŭ.
Paviedamlajecca, što ŭ śpis dla prypynieńnia akredytacyi patrapili ahienctva «Rośsija siehodnia» i ŭsie rasijskija telekanały, akramia «Doždia».
Pra heta raspaviała śpikier SBU Alena Hitlanskaja. «Śpis składzieny i 19 lutaha pieradadzieny ŭ aparat Viarchoŭnaj Rady. U śpisie bolš za 100 ŚMI. Rašeńnie pa kožnym prymałasia asobna, paśla dbajnaj pravierki kantentu», — skazała Hitlanskaja.
Pres-sakratar rasijskaha prezidenta Dźmitryj Piaskoŭ užo zajaviŭ, što pytańnie ab niedapuščalnaści padobnych krokaŭ budzie padymacca «na samych roznych uzroŭniach».
«Z raźvićciom sučasnych infarmacyjnych technałohij padobnyja represiŭnyja miery dalokija ad taho, kab być efiektyŭnymi, tamu što tyja hramadzianie Ukrainy, jakija šukajuć roznuju infarmacyju, adroznuju ad rusafobskaj prapahandy, jakuju my čaściakom čujem na Ukrainie, zaŭsiody mohuć znajści jaje, vykarystoŭvajučy ŭsie dasiahnieńni sučasnych technałohij», — cytuje Piaskova Interfaks.
Rašeńnie ab časovym prypynieńni akredytacyi rasijskich ŚMI było pryniata Viarchoŭnaj Radaj jašče 12 lutaha. Tady ž SBU było daručana skłaści «čorny» śpis ŚMI, akredytacyju jakim treba prypynić.
Paviedamlajecca, što havorka idzie tolki pra zarehistravanyja u Rasii vydańni, telekanały i radyjostancyi; ukrainskich «dačok» rasijskich kampanij rašeńnie nie zakranie.
Zhodna z pałažeńniami dakumienta, akredytacyju rasijskim ŚMI mohuć prypynić na praciahu dvuch dzion z dnia jaho pryniaćcia, hetaja miera budzie dziejničać da zaviaršeńnia siłavoj apieracyi ŭ Danbasie.
